Nike компанияси Hyperice билан ҳамкорликда машғулотлардан сўнг тикланишга мўлжалланган ғайриоддий шиппакларни тақдим этди. Янги маҳсулот Air Zoom Hyperslide деб номланиб, ўзида Air Zoom амортизацион таглигини ва Hyperice’нинг иссиқлик ҳамда тебраниш терапияси тизимини мужассамлаштирган. Сотувлар 29 сентябрдан Nike ва Hyperice сайтларида ҳамда дунё бўйлаб айрим фирма дўконларида бошланади.
Янги моделнинг асосий ғояси тикланиш жараёнини кундалик одатга айлантиришдан иборат. Қизғин машғулот, югуриш ёки мусобақадан кейин спортчилар кўпинча мушакларни бўшаштиришга кам эътибор қаратади, ваҳоланки, айнан шу босқич чарчоқни камайтиришга ва организмни навбатдаги юкламаларга тайёрлашга ёрдам беради. Шу сабабли Nike ва Hyperice кўпчилик машғулотдан сўнг дарҳол киядиган пойабзалнинг ўзига зарур функцияларни жойлаштиришга қарор қилди.
Air Zoom Hyperslide’нинг асосий хусусияти — унинг созланувчи тасмаси ичига жойлаштирилган ечиладиган магнит модулидир. У оёқ устини 47 даражагача иситади ва айни вақтда мушакларни бўшаштиришга ёрдам берадиган тебраниш ҳосил қилади. Иситишнинг учта даражаси ва тебраниш интенсивлигининг учта даражаси мавжуд. Битта тикланиш сеанси 15 дақиқа давом этади. Созламаларни модулнинг ўзидаги тугмалар ёки Hyperice мобил иловаси орқали бошқариш мумкин. Шу билан бирга, оёқ кийим таглиги юмшоқлик, амортизация ва қулайроқ юришни таъминлайдиган Nike Air Zoom технологияси асосида ишланган.
Nike’нинг спорт инновациялари бўйича катта директори Тоби Ҳетфилднинг сўзларига кўра, компания кийилиши билан тикланиш жараёнини бошлаб юборадиган пойабзал яратишни мақсад қилган. Hyperice асосчиси Энтони Кацнинг айтишича, лойиҳанинг мақсади замонавий тикланиш технологияларини оммабоп қилиш ҳамда икки компания ишланмаларини битта оддий қурилмада бирлаштиришдан иборат.
Air Zoom Hyperslide сотувга чиқарилишидан аввал профессионал спортчилар, ҳам ҳаваскорлар томонидан синовдан ўтказилди. Иккала бренднинг элчиси бўлган Нидерландия терма жамоаси футболчиси Виржил ван Дейкнинг таъкидлашича, иссиқлик ва тебраниш уйғунлиги машғулотлардан сўнг оёқдаги чарчоқни тезроқ кетказишга ёрдам беради, Nike таглиги туфайли эса уни кундалик ҳаётда кийиш қулайдир.
Hyperice учун бундай технологиялар аллақачон ўзига хос “ташриф қоғози”га айланиб улгурган. Компания кўплаб профессионал спортчилар фойдаланадиган массаж қурилмалари, компрессия тизимлари ва тикланиш учун мўлжалланган бошқа қурилмаларни ишлаб чиқаради. Янги шиппаклар Nike ва Hyperice ҳамкорлигида яратилган, тикланиш учун худди шундай функцияларга эга бўлган Hyperboot ботинкаларидан кейинги иккинчи маҳсулотдир. Ҳар иккала модел ҳам Nike стратегиясини акс эттиради, унга кўра спортчига нафақат машғулот ва мусобақалар пайтида, балки улар орасидаги дам олиш даврида ҳам ғамхўрлик қилиш лозим.
