UFC бош директори Дана Уайт собиқ UFC чемпиони Конор Макгрегор 2026 йил ёзида октагонга қайтишига ишонч билдирди. Бу ҳақда у журналист Жим Роме берган интервьюсида сўз очди.
“Мен Конорнинг бу йил жанг қилишига тўлиқ ишонаман. У ҳозир машғулот олиб бормоқда ва бу жараёндан видеолар ҳам пайдо бўляпти. Ўтган йили ҳам жанг қилади деб ўйлагандим, бироқ бу амалга ошмади. Аммо ҳозир унинг ёзда жанг қилиши борасида анча ишончим комил. У жуда мотивацияланган кўринмоқда, мунтазам шуғулланяпти ва саҳна ортида ҳам кўплаб ижобий жараёнлар кетмоқда”, деди Дана Уайт.
Макгрегор 37 ёшда. У охирги марта 2021 йил июль ойида UFC 264 турнирида америкалик Дастин Порьега қарши жанг қилган ва ўша баҳсда оёғини синдириб олган эди. Шундан буён ирландиялик жангчи октагонга чиқмаган.
Маълумот учун, Макгрегорнинг ММА’даги рекорди – 22 ғалаба ва 6 мағлубият. У аввал UFC ярим енгил ва енгил вазн тоифаларида чемпионлик камарларини қўлга киритган.
