Англия терма жамоасининг собиқ сардори Дэвид Бекхэм футбол ва Британия жамиятига қилган хизматлари учун расман рицарлик унвонига сазовор бўлди, деб хабар беради BBC.
50 ёшли Бекхэм сешанба, 4 ноябр куни Беркширда бўлиб ўтган маросимда қирол Чарлз III томонидан рицарлик унвонига сазовор бўлди.
«Мен ниҳоятда фахрланаман. Одамлар менинг қандай ватанпарвар эканлигимни билишади — мен ўз ватанимни севаман. Ҳар доим монархия оилам учун қанчалик муҳимлигини айтганман. Мен дунё бўйлаб саёҳат қилиш бахтига муяссар бўлдим ва одамлар мен билан фақат бизнинг монархиямиз ҳақида гаплашмоқчи, бундан фахрланаман», деди собиқ футболчи.
Бекхэм 2013 йилда футболдан нафақага чиқди. У «Манчестер Юнайтед», «Реал Мадрид», ПСЖ, Милан ва Лос-Анжелес Гэлекси жамоаларида ўйнаган. Бекхэм Англия, Испания ва Франция чемпионатларида, шунингдек, Чемпионлар Лигасида ғолиб чиққан. Ҳозирда Бекхэм Лионел Месси ўйнайдиган Американинг «Интер Майами» клубининг ҳам эгасидир.
