Европа комиссияси америкалик миллиардер Илон Маскка тегишли X ижтимоий тармоғини Европа Иттифоқининг рақамли хизматлар тўғрисидаги регламентида белгиланган “шаффофликни таъминлаш мажбуриятларини бузгани” учун 120 миллион евро миқдорида жаримага тортди.
Еврокомиссиянинг баҳолашича, Х’даги “кўк белги” дизайни чалғитувчи, чунки у аккаунт эгасининг шахсини тасдиқлаш ўрнига пулли хизматга айлантирилган, Х’нинг реклама кутубхонаси етарлича шаффоф эмас ва платформа олимларга қонунга мувофиқ очиқ бўлиши керак бўлган маълумотларга киришни таъминламаяпти.
Еврокомиссия 120 миллион евро жарима билан якунланган текширувдан ташқари, X ижтимоий тармоғининг ноқонуний контент тарқалишининг олдини олиш ва ахборотни манипуляция қилишга қарши курашиш бўйича саъй-ҳаракатлари самарадорлиги юзасидан яна бир нечта текширувлар олиб бормоқда.
Европа Иттифоқининг рақамли хизматлар тўғрисидаги регламенти компанияларга глобал йиллик айланмасининг 6 фоизигача жарима солишга имкон беради. X тармоғининг айланмаси бир неча миллиард еврога баҳоланган бўлса-да, Илон Маскнинг барча корхоналарининг умумий айланмаси бу кўрсаткичдан бир неча баробар юқоридир.
Еврокомиссия вице-президенти Хенна Вирккунен жарима миқдорини қоидабузарликларнинг мазмуни, оғирлиги ва давомийлигини ҳисобга олган ҳолда мутаносиб деб баҳолаган. Шу билан бирга, у мутаносиблик тамойилига асосланиб, жарима миқдорини ҳисоблаш схемасини аниқлаштирмаган ва буни “оддий иқтисодий формулага келтириб бўлмаслигини” таъкидлаган.
Politico нашрининг қайд этишича, Брюсселнинг бу қарори ЕИ ва АҚШ ўртасида технологик компанияларни тартибга солиш бўйича муносабатлардаги кескинликни янада оширади. Вашингтон Европа Иттифоқининг рақамли хизматлар бўйича регламентини бир неча бор танқид қилиб, уни цензура билан тенглаштирган ва бунга жавобан Европа импортига қўшимча божхона тўловларини жорий этиш билан таҳдид қилган.
АҚШ вице-президенти Жей Ди Венс эса бундай жарималарни Америка компанияларига нисбатан ҳужум деб атаган.
“Еврокомиссия платформани цензура қилмагани учун Хъни юзлаб миллион доллар жаримага тортиши ҳақида миш-мишлар тарқалмоқда. Европа Иттифоқи сўз эркинлигини қўллаб-қувватлаши ва Америка компанияларини асоссиз даъволар туфайли ҳужумларга дучор қилмаслиги керак”, деб ёзди Венс Х’даги саҳифасида.
Еврокомиссиянинг таъкидлашича, регламентнинг цензура билан ҳеч қандай алоқаси йўқ, у фақат шаффофликни таъминлашга қаратилган.
