Эрон томони кеча, 5 март куни Нахичевонга қилинган ҳужумини жиддий текширишга ваъда берди. Бу ҳақда Озарбайжон Ташқи ишлар вазири Жайҳун Байрмов бугун, 6 март куни ўтказилган матбуот анжуманида маълум қилди.
Вазир Эрон текширув ўтқазишга ваъда берганини ва текширув натижаларини кутаётганини айтган.
“Кеча, 5 март куни Эрон Ташқи ишлар вазири билан телефон орқали суҳбат давомида ушбу масалани жиддий муҳокама қилдик. Эрон томони содир бўлган воқеани пухта текширишга ваъда берди ва биз текширув натижаларини кутмоқдамиз”, деган Байрамов.
Вазирнинг айтишича, кеча содир бўлган дрон ҳужуми билан боғлиқ ҳолда давлат раҳбари томонидан тегишли топшириқлар берилган.
“Ушбу ҳодиса бўйича аллақачон дипломатик қадамлар қўйилди: норозилик нотаси юборилди, мавқедошим билан телефон орқали суҳбатлашдик. Эрон томони бошлаган текширув умумий жараённинг бир қисми ҳисобланади. Озарбайжон хавфсизлиги давлат раҳбарининг қатъий назорати остида”, деган Байрамов.
