АҚШ Ҳиндистонга тахминий қиймати 93 миллион долларга тенг бўлган иккита йирик ҳарбий савдо пакетини маъқуллади. Эндиликда Деҳлига FGM-148 Javelin танкга қарши ракета тизимлари ва М982А1 Excalibur бошқариладиган снарядлари етказиб берилади. Бу ҳақда The Economic Times хабар берди.
Мудофаа хавфсизлиги ҳамкорлик агентлиги (DSCA) ушбу шартномалар тўғрисида АҚШ Конгрессини хабардор қилган. Агентлик маълумотларига кўра, пакетга қуйидагилар киритилган:
- Excalibur снарядлари ва тегишли жиҳозлар: 47,1 миллион доллар;
- Javelin ракета тизимлари ва қўшимча ускуналар: 45,7 миллион доллар.
Савдо Ҳиндистон билан стратегик муносабатларни мустаҳкамлайди
DSCA ўз баёнотида ушбу битим АҚШ ташқи сиёсати ва миллий хавфсизлик мақсадларини қўллаб-қувватлашини таъкидлаган.
“Ушбу таклиф этилаётган савдо АҚШ—Ҳиндистон стратегик муносабатларини мустаҳкамлаш ва Ҳинд-Тинч океани ҳамда Жанубий Осиё минтақаларида сиёсий барқарорлик, тинчлик ва иқтисодий тараққиёт учун муҳим куч бўлиб қолаётган йирик мудофаа ҳамкоримиз хавфсизлигини яхшилашга ёрдам беради”, дейилади Агентлик хабарида.
Шунингдек, DSCA савдо минтақадаги асосий ҳарбий мувозанатни ўзгартирмаслигини қўшимча қилган. DSCA Ҳиндистон 216 донагача М982А1 Excalibur тактик снарядларини сотиб олишни сўраганини қайд этган. Бош пудратчи сифатида Виржиния штатининг Арлингрон шаҳрида жойлашган РТХ Corporation компанияси белгиланган.
АҚШ ҳукуматининг маълум қилишича, ушбу битим Вашингтоннинг Деҳли билан мудофаа алоқаларини чуқурлаштириш бўйича стратегик мақсадига мос келади. Чунки Ҳиндистон ўз кучларини модернизация қилишда ва узоқ масофали аниқ зарба бериш қобилиятини кенгайтиришда давом этмоқда.
