Буюк Британия ва Норвегия Россиядан таҳдидларига қарши кураш мақсадида сувости кабелларини ҳимоя қилиш ва сувости кемаларини овлаш учун денгиз иттифоқи тузди. Бу ҳақда Euronews хабар берди.
Британия бош вазири Кир Стармер норвегиялик ҳамкасби Ёнас Гар Стёре билан мудофаа масалалари бўйича музокаралар ўтказган. Британия ҳукуматининг маълум қилишича, камида 13 та ҳарбий кемадан иборат қўшма флот Россия сувости кемаларини овлайди ва Шимолий Атлантикадаги муҳим инфратузилмани ҳимоя қилади. Норвегия мудофаа вазири Торе Сандвик британиялик ҳамкасби Жон Хили билан ушбу келишувни имзолаб, бу ҳамкорлик икки давлатга биргаликда ҳимояланиш имконини беришини таъкидлаган.
Бу келишув аввалги, август ойида Норвегия Британияда ишлаб чиқарилган камида бешта фрегатни сотиб олиш бўйича тузган 11 миллиард евролик шартномадан кейин имзоланмоқда. Расмийларнинг айтишича, Норвегия кемалари ва саккизта Британия кемаси НАТОнинг шимолий қаноти бўйлаб денгизларда биргаликда ҳаракат қилади.
Стармер тарихий деб атаган ва 4 декабрь куни Лондонда мудофаа вазирлари томонидан расман имзоланган келишув доирасида, Буюк Британия Қироллик денгиз флоти кемалари учун Норвегия ракеталаридан фойдаланишга рози бўлган.
“Таҳдид кучайиб бораётган бир даврда ва Шимолий Атлантикада Россия фаоллиги ортиб бораётган бир пайтда, бизнинг қудратимиз куч ва иттифоқларга асосланади”, деган Жон Хили.
Россия таҳдиди
Британия расмийларининг билдиришича, Россия ҳарбий-денгиз кучларининг мамлакат сув ҳудуди атрофидаги фаоллиги сўнгги икки йил ичида 30 фоизга ошган. НАТОнинг кибер ва гибрид таҳдидлар бўйича етакчи эксперти 2024 йил охирида Европа бўйлаб сувости кабелларига доимий ҳужумлар Ғарб инфратузилмаси учун энг асосий таҳдид эканини айтган эди.
Ноябрь ойи бошида Болтиқ денгизида Швеция ва Литва ўртасидаги икки кабелнинг, шунингдек, Германия ва Финляндия ўртасидаги яна бир кабелнинг узилиши аъзо давлатлар ва НАТОнинг саботаж хавфи борасидаги хавотирини ошириб юборган.
