АҚШ Президенти Дональд Трамп Украинада коррупция билан боғлиқ муаммолар борлигига қарамай келишув тузиш имконияти сақланаётганини билдирди. Бу ҳақда у кеча, 30 ноябрь куни Флоридада гольф ўйнаб, Вашингтонга қайтиб келар чоғида сўз очди.
“Уларда коррупциявий вазият бор. Лекин келишув тузишимиз мумкин бўлган яхши имконият ҳам бор”, деган Оқ уй раҳбари.
Гап Украина энергетика соҳасидаги йирик коррупция можароси ҳақида кетмоқда. Бу можаро Украина Энергетика вазири Герман Галущенко, Адлия вазири Светлана Гринчук ва Президент офиси раҳбари Андрей Ермакнинг истеъфосига олиб келди.
Трампнинг айтишича, музокаралар “давом этмоқда ва яхши кетмоқда”. У Россия ва Украина учун аниқ муддат белгиламаганини таъкидлаган.
Украина делегацияси раҳбари Рустам Умаров АҚШ билан учрашувни “қийин, аммо самарали”, деб таърифлаган ва “адолатли тинчликка эришиш йўлида сезиларли илгарилаш” борлигини билдирган.
Қайд этиш жоиз, Стив Уиткофф бугун, 1 декабрь куни Россия Президенти Владимир Путин билан учрашиш учун Москвага йўл олади.
