Мексикада “Коинот гўзали” (Miss Universe) ташкилоти президенти Рауль Роча гиёҳванд моддалар, қурол-яроғ савдоси ва ёқилғи ўғирлаш билан боғлиқ гумонлар юзасидан тергов қилинмоқда. Бу ҳолат гўзаллик танлови атрофидаги можаро ва баҳсларни янада кучайтирди.
Мексика бош прокуратураси тергов доирасида 13 та ҳибсга олиш ордери чиқарилганини таъкидлади, бироқ шахсларнинг исми ошкор этилмади. Маҳаллий ОАВ эса ушбу ордерлардан бири айнан Рауль Рочага нисбатан чиқарилганини хабар қилмоқда. Прокуратура ҳужжатларида у “Raul R” деб қайд этилган.
Роча “Коинот гўзали” ташкилотининг 50 фоиз улушига эгалик қилади. У 2024-йилда Legacy Holding Group USА компанияси орқали бу улушни JKN Global Group’дан сотиб олган.
- Танлов ва норозиликлар
Мексикалик Фотима Баш 21 ноябрь куни Таиландда бўлиб ўтган 2025-йилги Miss Universe танловида ғолиб бўлди. Мусобақа давомида у бошқа иштирокчилар билан бирга норозилик акциясига бошчилик қилди. Bosch танлов директори Нават Ицарагрисил уни “аҳмоқ” деб ҳақорат қилганини айтди, бироқ директор бундай сўзни ишлатмаганини таъкидлади.
Башни Мексика президенти Клаудия Шейнбаум қўллаб-қувватлаб, уни “аёлларнинг ўз фикрини очиқ айта олишига намуна” деб баҳолади.
- Ташкилот эгалари ва молиявий можаро
Аввал Miss Universe танлови АҚШ президенти Дональд Трампга тегишли бўлган. 2022-йилдан буён эса у таиландлик тадбиркор Анне Жакражутатип ва унинг ЖКН Глобал компаниясига қарашли.
Сўнгги танловдан кўп ўтмай, ташкилот эгалари бир нечта давлатда ҳуқуқий муаммоларга дуч келди. Таиландда улар фирибгарликда айбланмоқда, Мексикада эса гиёҳванд моддалар ва қурол савдоси билан боғлиқ тергов олиб борилмоқда. Бу ҳолат танлов нуфузи ва обрўсига жиддий путур етказди.
Жакражутатип Бангкок судига келмагани сабаб қидирувга берилган. У инвестор билан 30 миллион баҳт (тахминан 930 минг доллар) миқдоридаги низоли иш бўйича судда қатнашиши керак эди. Суд унинг манзили номаълум эканини билдирган ва ҳибсга олиш ордерини чиқарган.
Associated Press хабарига кўра, JKN Global 2023-йилдан буён оғир молиявий инқирозга юз тутган. 2024-йилда компания банкротлик суди орқали молиявий тикланиш жараёнини бошлаган. Компаниянинг умумий қарзи қарийб 3 миллиард баҳтни (92,6 миллион доллар) ташкил этади.
