Кеча, 28 апрель куни Германияда Россия фойдасига қўпорувчилик ҳаракатларига тайёргарлик кўриш ва жосуслик қилишда гумонланаётган Қозоғистон фуқароси қўлга олинди. Бу ҳақда “Deutsche Welle” хабар берди.
Прокуратура талқинига кўра, у “2025 йил май ойидан кечиктирмай” Россия махсус хизматларига Германия мудофаа саноати ҳақидаги маълумотларни, хусусан Берлиндаги ҳукумат бинолари, автомагистраллардаги ҳарбий колонналар ва сиёсатчиларнинг хизмат автомобиллари фотосуратларини етказиб турган. Тергов маълумотларига кўра, қозоғистонлик шахс суратларни асосан ўзининг смартфонида олган ва уларни Россия махсус хизматидаги алоқадор шахсга юборган.
47 ёшли эркак 28 апрель куни қўлга олинган ва бир сутка ичида судга олиб борилиши керак. Суд уни ҳибсда сақлаш бўйича қарор қабул қилади.
ARD ва SWR хабарига кўра, терговчилар қўлга олинган шахснинг мобил телефонини таҳлил қилиб, материалларнинг кўплиги ва ҳаракатлар миқёсидан ҳайратда қолган. Бошқа томондан, у асосан ҳамма кўриши мумкин бўлган ёки оммага маълум бўлган нарсаларни суратга олган. Бироқ ҳуқуқий нуқтаи назардан, бу “жосуслик фаолияти” учун жиноий жавобгарликни истисно этмайди, чунки гап НАТОга аъзо давлатнинг ҳарбий транспорти ҳақида кетмоқда.
Терговчилар гумонланувчининг қўпорувчилик ҳаракатлари амалга оширилиши мумкин бўлган жойлар ҳақида маълумот тўплагани ва Германияда бундай операциялар учун одамларни ёллашни таклиф қилганини “айниқса ташвишли” деб ҳисобламоқда. Тергов маълумотларига кўра, у ўзи алоқада бўлган шахсга “ҳар қандай ишга тайёрлигини” билдирган.
