Бухоро вилоятида 5 кг симобни 240 минг долларга сотмоқчи бўлган икки шахс қўлга олинди. Бу ҳақда Ички ишлар вазирлиги хабар берди.
Маълум қилинишича, Бухоро вилояти Ғиждувон туманидаги кафеларнинг бирида муқаддам ўғрилик ва босқинчилик каби жиноятлар билан судланган 1983 йилда туғилган шахс харидорга Ўзбекистон ҳудудида эркин айланмаси таъқиқланган ярим кг симоб моддасини 15 минг долларга пулламоқчи бўлган. Гумонланувчи келишилган пуллардан 4 минг долларни олаётган вақтда қўлга олинган.
Яна бир тезкор тадбир давомида эса Ғиждувон туманининг “Зарангар” қишлоғида яшовчи 1961 йилда туғилган шахс ўз ҳовлисидаги асалари қутилари ичида 5 кг симобни яшириб келаётгани аниқланган. У ушбу заҳарли модданинг ҳар бир килограммини 40 минг доллардан, жами 240 минг долларга сотишни режа қилган. Тадбир давомида ундан яшил рангли шиша идишда 5 кг симоб моддаси ашёвий далил сифатида олинган.
Ҳозирда ҳолат юзасидан Жиноят кодексининг 185-1- моддаси (рангли металлар, уларнинг парча ва резги чиқитларини тайёрлаш, олиш, улардан фойдаланиш ҳамда ўтказиш қоидаларини бузиш) 3-қисми “а” банди билан жиноят иши қўзғатилган.
