Ички ишлар вазирлиги Тезкор-қидирув департаменти ҳамда Давлат хавфсизлик хизмати ходимлари томонидан Тошкент шаҳар ҳудудида инсон аъзолари ва тўқималарининг олди-сотдиси билан шуғулланувчи шахслар қўлга олинди.
Аниқланишича, муқаддам Жиноят кодексининг 277-моддаси (безорилик) иккинчи қисми билан судланган 1989-йилда туғилган фуқаро турмуш ўртоғи билан биргаликда ўзаро жиноий тил бириктириб, осон пул топиш мақсадида инсонларда раҳм уйғотувчи видеолар тайёрлаб, интернет саҳифаларига жойлаб борган.
Олиб борилган тезкор тадбир натижасида эркак ижтимоий тармоқлар орқали инсон аъзолари ва тўқималарининг ноқонуний олди-сотдиси билан доимий равишда шуғулланиб келаётгани, мижозларни операция қилиш учун Тожикистоннинг Душанбе шаҳридаги “Истиқлол” клиникасига олиб бораётгани маълум бўлди.
У ўзига ҳам буйрак кўчириш операциясини амалга оширган ва унга бу ишларда ёрдам берганлар ҳам аниқланди. Улар орасида Telegram, Instagram, YouTube ижтимоий тармоқлари канал юритувчиси ҳам яқиндан ёрдам бериб келган.
Мазкур ҳолат юзасидан инсон органларининг ноқонуний олди-сотдиси билан шуғулланиб келган шахсга нисбатан Жиноят кодексининг 133-1-моддаси (инсон аъзоларининг ва тўқималарининг олди-сотдиси) иккинчи қисмига асосан жиноят иши қўзғатилиб, қамоқ эҳтиёт чораси қўлланилган.
Кодексга кўра, инсон аъзоларининг ёки тўқималарининг олди-сотдиси, 3 йилдан 5 йилгача озодликни чеклаш ёки 1 йилдан 3 йилгача муайян ҳуқуқдан маҳрум этиб, 3 йилдан 5 йилгача озодликдан маҳрум қилиш билан жазоланади. Ўша ҳаракатлар такроран ёки хавфли рецидивист томонидан, бир гуруҳ шахслар томонидан олдиндан тил бириктириб содир этилган бўлса 5 йилдан 10 йилгача озодликдан маҳрум қилиш билан жазоланади.
