Бангладешда нипаҳ вирусини юқтирган бемор вафот этди. Жаҳон соғлиқни сақлаш ташкилоти (ЖССТ) касалликнинг халқаро миқёсда тарқалиш хавфини ҳали ҳам паст баҳоламоқда. Бу ҳақда Al Jazeera хабар берди.
ЖССТ маълумотига кўра, вафот этган бемор 40–50 ёшлар оралиғидаги аёл бўлиб, Наогаон туманида яшаган. Унда 21 январдан бошлаб иситма ва асаб тизими билан боғлиқ аломатлар кузатилган. Беморнинг хорижга сафар қилмагани, бироқ у яқинда палма дарахти ширасини истеъмол қилгани маълум бўлган.
Аёл 28 январь куни шифохонага ётқизилган. Унинг томоғидан суртмалар ва қон намуналари олинган. Эртаси куни унинг вирус юқтиргани лаборатория текширувлари орқали тасдиқланган.
ЖССТ мамлакатда нипаҳ вирусининг илк ҳолати аниқлангани ҳақида 3 февраль куни хабардор қилинган. Бу хабар Ҳиндистоннинг Ғарбий Бенгалия штатида вирус тарқалаётгани ҳақидаги маълумотдан икки ҳафта ўтиб эълон қилинган.
Ҳиндистонда нипаҳ вирусининг тарқалиши Хитой ва Жануби-шарқий Осиёнинг бир қанча мамлакатларида хавотирларни кучайтирди. Натижада аэропортларда тиббий текширувлар кучайтирилди. Бироқ ЖССТ ҳозирги маълумотларга асосланиб, ҳеч қандай саёҳат ёки савдо чекловларини тавсия қилмаслигини билдирди.
“ЖССТ нипаҳ вируси билан боғлиқ умумий жамоат саломатлиги хавфини миллий, минтақавий ва глобал даражада паст деб баҳолайди. Халқаро миқёсда касалликнинг тарқалиш хавфи паст”, дейилади баҳолаш хулосасида.
Бангладешда бемор билан алоқада бўлган 35 нафар шахс вирусга текширилган. Ҳозирча бошқа касалланиш ҳолатлари аниқланмаган. 2001-йилдан буён мамлакатда 348 га яқин нипаҳ вируси ҳолатлари қайд этилган. Уларнинг қарийб ярми хом хурмо ширасини истеъмол қилгани тасдиқланган шахслар орасида аниқланган.
Касаллик одатда декабрдан апрелгача мавсумий равишда авж олади. Бу давр палма дарахти ширасини йиғиш ва истеъмол қилиш мавсумига тўғри келади. Ҳозирда нипаҳга қарши махсус тасдиқланган дори воситалари ёки вакциналар мавжуд эмас. Вирус билан зарарланганлар орасида ўлим даражаси 40 фоиздан 75 фоизгача етиши мумкин.
ЖССТ раҳбари Тедрос Аданом Гебреесус аввалроқ берган баёнотида нипаҳни “камдан кам учрайдиган, аммо жиддий касаллик” деб атаган эди. Nipah вируси илк бор қарийб 30 йил аввал аниқланган бўлиб, асосан, кўршапалаклар ва чўчқалар орқали юқади. Айниқса, кўршапалаклар тишлаган ёки тирноқ изи тушган меваларни истеъмол қилиш, ушбу ҳайвонлар билан яқин контактда бўлиш вирус юқиш хавфини оширади.
