СССР ва Россия фойдасига жосуслик қилгани учун АҚШда жазо ўтаётган собиқ разведкачи Алдрич Эймес 84 ёшида вафот этди. Бу ҳақда The Washington Post хабар берди.
Маҳкум 5 январь куни Мериленд штати Кумберленд шаҳридаги федерал қамоқхонада жон берган. АҚШ қамоқхоналар бюроси ўлим сабабини ошкор этмади. Эймес муддатидан олдин озод этилиш ҳуқуқисиз умрбод қамоқ жазосини ўтаётган эди.
У 1985–1994-йилларда дастлаб совет, кейинчалик Россия разведкасига Марказий разведка бошқармаси (МРБ) ва иттифоқчи махсус хизматлар билан ҳамкорлик қилган агентлар номлари, шунингдек, юзлаб разведка амалиётларига оид маълумотларни узатган. Тергов билан келишув доирасида Эймес хизмат фаолияти давомида билган маълумотларни берганини тан олган.
АҚШ Мудофаа вазирлиги маълумотларига кўра, Эймес Москвага камида ўнта агент ҳақида маълумот берган. Уларнинг камида тўққиз нафари СССРда қатл этилган. АҚШ расмийлари бу рақамлар разведка маълумотлари ва қочқинлар кўрсатмаларига асосланганини, Россия томони эса бу шахслар тақдирини расман тасдиқламаганини таъкидлаган.
Эймес ҳибсга олинганидан сўнг The Washington Post’га берган интервьюсида ўз ҳаракатлари “одамлар ўлимига олиб келганини” тан олган. Бироқ судда у фаолиятининг оқибатларини юмшатишга уриниб, разведка урушларини миллий хавфсизлик учун иккинчи даражали масала сифатида кўрсатган.
Суд ҳужжатларида Эймес моддий манфаат сабаб ҳаракат қилгани қайд этилган: Москва билан ҳамкорлиги эвазига у 1 миллион доллардан ортиқ нақд пул, шунингдек, қўшимча тўловлар ва Россияда кўчмас мулк ваъдаларини олган.
Эймес 1994 йил февралида Федерал Қидирув бюроси ва МРБ томонидан олиб борилган узоқ йиллик тергов натижасида қўлга олинган. Ўша йили у айбини тан олиб, тергов билан ҳамкорлик қилгани эвазига унинг рафиқасига нисбатан жазо енгиллаштирилган.
Эймес АҚШ разведкасига катта зарар етказганига қарамай, Россия ҳеч қачон уни озод қилиш ёки маҳбуслар алмашинуви рўйхатига киритиш бўйича ҳаракат қилмаган.
