Эрон Ислом инқилоби қўриқчилари корпуси Ҳормуз бўғозида АҚШнинг учувчисиз сувости кемасини қўлга олганини маълум қилди. Бу ҳодиса ҳарбий амалиётларда сувости дронларидан қандай фойдаланилаётганини кўрсатиб берди.
Эрон давлат ОАВнинг билдиришича, қўлга олинган сувости дрони Калифорниянинг Anduril мудофаа компанияси томонидан ишлаб чиқилган Dive-LD русумли йирик автоном сувости аппаратидир.
Компания маълумотларига кўра, узунлиги 5,8 метр бўлган бу сувости аппарати турли вазифаларни бажаради. У минага қарши чоралар кўриш, денгиз тубини хариталаш, разведка маълумотларини йиғиш ҳамда кабел ва қувурлар каби сувости инфратузилмаларини кўздан кечириш имкониятига эга.
More stories“Биз Ҳормуз бўғозида террорчи Америка армиясининг замонавий ва ақлли дрон кемаларидан бирини тутиб олдик. Бу аппарат энг сўнгги технологиялар билан жиҳозланган”, дейилади корпус ҳарбий-денгиз кучлари баёнотида.
Пентагон матбуот котиби бунга жавобан сувости дрони бир неча кун олдин ишдан чиққанини билдирди.
“У давом этаётган амалиётларни қўллаб-қувватлаш учун ҳудудий сувларда кузатув олиб бораётган эди. Носоз дрон эски модел бўлиб, унда махфий маълумотлар ёки сирли сонар ва радар ускуналари бўлмаган”, деди Пентагон вакили.
Андурил компанияси ҳам ўз аппаратларидан бири йўқотилганини тасдиқлади, бироқ бу ҳодисага унчалик катта эътибор қаратмади.
“Dive-LD автоном тизим бўлиб, у бошиданоқ йўқотилиш эҳтимоли юқори бўлган хавфли муҳитда ишлаш учун мўлжалланган”, деди компания вакили.
АҚШ ҳарбийлари денгизчилар ҳаётини хавфга қўймасдан уммонларни кузатиш ва душман гуруҳларини кузатиб бориш учун денгиз дронларига катта маблағ ажратмоқда.
Компания сайтидаги маълумотларга кўра, Dive-LD базага қайтмасдан 10 кунгача ишлай олади. У 6000 метргача бўлган чуқурликка шўнғишга мўлжалланган. DefenseScoop арбий янгиликлар сайтининг хабар беришича, ҳар бир шундай Dive-LD қурилмасининг нархи тахминан 2,5 миллион долларни ташкил этади.
