Хитойнинг Хубей провинциясида яшовчи 26 ёшли Сун Синюй “Ўргимчак одам” филмидаги Яшил Гоблин учадиган қурилмага ўхшаш учар скейтборд яратди. Ихтирочи уни ишлаб чиқишга икки ойга яқин вақт сарфлаган. Бу ҳақда International Business Times хабар берди.
Ижтимоий тармоқларда тарқалган видеоларда Сун ўзи ясаган платформа устида туриб ҳавога кўтарилгани, бир жойда муаллақ тургани ва ерга қўнганини кўриш мумкин. Қурилма махсус двигателлар ёрдамида тик кўтарилади ва ер устида ҳаракатланади.
Дастлабки синов муваффақиятсиз якунланди
Сун аввалига реактив двигателли қурилма ясаган, бироқ у синов вақтида ёниб кетган. Ёнғин ускуналарга зарар етказгач, ихтирочи қурилма тузилишини қайта кўриб чиқишга мажбур бўлган.
Шундан сўнг у муаммони таҳлил қилишда сунъий интеллектдан фойдаланиб, электр двигателли янги моделни ишлаб чиққан. Маълумотларга кўра, такомиллаштирилган платформага 10 та электр двигатель ўрнатилган. У одамни ердан унча баланд бўлмаган масофага кўтара олади.
Ихтирочи очиқ ҳудудларда учишни бошлашдан олдин 10 кундан ортиқ вақт давомида қурилмани бошқаришни машқ қилган. Октябрь ойидаги Хитой миллий байрамлари вақтида эса Бадун атрофида, жумладан, Янсзи дарёси ва Барен дарёсининг манзарали ҳудудларида синов парвозларини ўтказган. У икки дақиқада 300 метрдан ортиқ масофани босиб ўтган.
Сун қурилмани бошқаришга ёрдам берадиган сунъий интеллект тизимини ҳам яратган. Мобил телефонлар ёрдамида ишлайдиган ушбу тизим парвоз шароитларини баҳолайди ва фойдаланувчига танасини қандай тутиш кераклигини кўрсатади. Чунки платформанинг мувозанати унда турган одамнинг ҳаракатларига бевосита боғлиқ.
Ихтиро интернетда катта қизиқиш уйғотган бўлса-да, қурилманинг хавфсизлиги ва ишончлилиги билан боғлиқ муаммолар ҳали ҳал этилмаган.
Суннинг айтишича, учар скейтбордни кундалик транспорт воситасига айлантириш учун батарея қувватини, фавқулодда вазиятларда ишлайдиган хавфсизлик тизимларини, қурилманинг мустаҳкамлигини ва фойдаланувчи ҳимоясини такомиллаштириш керак.
Ҳозирча унга бундай қурилмадан аҳоли яшайдиган жойлар ва сув ҳавзалари яқинида фойдаланиш тақиқланган.
Шу билан бирга, хабарларга кўра, Хитойнинг бир нечта йирик корпорацияси мутахассислари ихтирога қизиқиш билдирган ва унинг имкониятларини юқори баҳолаган. Интернет фойдаланувчилари етарли маблағ ажратилса, қурилмадаги камчиликлар тезроқ бартараф этилишига умид қилмоқда.
