Туркия президенти Ражаб Тоййиб Эрдўғон Анқарага меҳмон бўлиб келган Германия канцлери Фридрих Мерцни Исроилни қўллаб-қувватлаб келаётгани сабаб кескин танқид қилди.
Эрдўғон Исроил сўнгги икки йил ичида Ғазо секторида қарийб 70 минг фаластинлик, жумладан, хотин-қизлар, болалар ва қарияларни ўлдиргани, Германия эса бундан кўз юмаётганидан таассуф изҳор этган.
“Германия наҳотки бу ҳолатни кўрмаётган бўлса?!” – дея Фридрих Мерцга хитоб қилган Эрдўғон Анқарадаги қўшма матбуот анжуманида.
Туркия раҳбари Германия канцлерининг Исроилни дастакловчи баёнотларига эътироз билдираркан, Тель-Авив ҳукумати Ғазода геноцид содир этаётгани, атайин, очликни юзага келтираётганини таъкидлаган.
“ҲАМАС на бомбалар, на ядро қуролига эга. Исроилда эса бундай қуроллар мавжуд ва у ушбу қуролларни Ғазо аҳлига қарши қўлламоқда”, – деган у.
Туркия раҳбарига кўра, Анқара Берлинга Ғазодаги хунрезликни тўхтатиш ва ихтилофни икки давлат тамойили асосида ҳал этиш бўйича позициясини аниқ-тиниқ билдирган.
“Биз (Ғазога) 100 минг тоннадан зиёд озиқ-овқат кўмагини юбордик, аммо бу етарли эмас. Инсонпарварлик кўмаги етказишни давом эттириш, геноцидни тўхтатиш, қасддан юзага келтирилган очарчиликка чек қўйиш керак. Германия Қизил хочи ва Туркия Қизил яримой жамиятлари жараёнда фаол иштирок этиши лозим”, – деган турк етакчиси.
Анқара Россия ва Украина ўртасидаги урушни тўхтатиш ҳам муҳим эканини урғулаган.
Эслатиб ўтамиз, президент Эрдўғон икки йил аввал Германиянинг ўша пайтдаги канцлери Олаф Шольцни ҳам Исроилнинг Ғазодаги халқаро ҳуқуққа зид ҳаракатларига қарши гапиришга ботина олмаётгани сабаб изза қилганди.
“Қачонгача юз бераётган ҳодисаларни кўра-била туриб сукут сақлаймиз? Агар қўлларимиз кишанбанд, тилларимиз боғлиқ бўлиб қолар экан, тарихга бунинг жавобини қандай берамиз?! Исроил – Фаластин зиддиятини қарздорлик психологияси нуқтаи назаридан баҳолаш тўғри эмас. Мен эркин сўзламоқдаман. Чунки бизнинг Исроилдан тили қисиқ жойимиз йўқ. Агар қарзимиз бўлганида бу қадар эркин гапира олмасдик. Зотан, (Исроилдан) қарздорлар эркин гапира олмаётир”, – деган эди Эрдўғон ўшанда.
Таҳлилчиларга кўра, Германия Иккинчи жаҳон урушида кўп сонли яҳудийлар қириб ташлангани, яъни Ҳолокост ҳодисаси сабаб Исроил ҳукуматининг ҳатто халқаро ҳуқуққа зид ҳаракатларини ҳам кескин танқид қилишга ботинмайди. Тарихий айбдорлик ҳисси кўпинча олмон сиёсий етакчиларининг тилини боғлаб туради.
