Ижтимоий тармоқларда эндиликда Қирғизистон, Туркманистон, Тожикистон ва Ўзбекистон давлатлари томонидан берилган таълим тўғрисидаги дипломлари ушбу давлатлар ҳудудида тўғридан-тўғри тан олиниши ҳақида хабарлар тарқалди. Ушбу ҳолатга Билим ва малакаларни баҳолаш агентлиги расмий муносабат билдирди.
Қайд этилишича, Ўзбекистонда хорижий давлатларда берилган дипломларни тан олиш “Таълим тўғрисида”ги қонун ҳамда Вазирлар Маҳкамасининг тегишли қарори билан тасдиқланган “Хорижий давлатларда таълим олганлик тўғрисидаги ҳужжатларни тан олиш тартиби ҳақида”ги низом талаблари асосида амалга оширилади.
Юқорида келтирилган маълумотлар асоссиз бўлиб, бугунги кунда Ўзбекистон, Қирғизистон, Туркманистон, Тожикистон ва Қозоғистон дипломларини ўзаро тан олиш бўйича халқаро шартнома мавжуд эмас.
Мазкур мамлакатларда хорижий давлатлар томонидан берилган таълим олганлик ҳақидаги дипломларни тан олиш уларнинг миллий қонунчилигида белгиланган талаблар асосида амалга оширилади.
