UFC’нинг икки вазн тоифасидаги собиқ чемпиони, ирландиялик Конор Макгрегор октагонга қайтиш учун расман рухсат олди. Бу ҳақда The Sun нашри хабар берди.
2025 йил октябрь ойида Макгрегор антидопинг қоидаларини бузгани учун 18 ойга дисквалификация қилинган эди. У 2024 йилда допинг-синов топширишга уч марта келмаган. Унинг бу ҳаракатлари ўз турар жойи ҳақида маълумот бериш тартибини бузиш сифатида баҳоланган эди. Макгрегорни четлатиш муддати 2024 йил 20 сентябрда бошланиб, 2026 йил 20 мартда якунига етди.
Ирландиялик жангчи 2026 йилнинг 11 июль куни АҚШнинг Лас Вегас шаҳрида бўлиб ўтадиган UFC 330 турнири доирасида жангга чиқиши кутилмоқда. Манбаларнинг маълумотига кўра, Макгрегор вакилларининг чемпионат раҳбарияти билан олиб борган музокаралари ижобий якунланган.
Макгрегор 37 ёшда, унинг ҳисобида аралаш яккакурашларда 22 ғалаба ва 6 мағлубият бор. Аввалроқ у ташкилотнинг ярим енгил ва енгил вазн тоифаларидаги чемпионлик камарларига эгалик қилган. 2021 йил июль ойида бўлиб ўтган америкалик Дастин Порьега қарши сўнгги жангида ирландиялик спортчининг оёғи синган эди.
