Беларусь президенти Александр Лукашенко мамлакати ўзбекистонлик мигрантларни қабул қилишдан мамнун эканини айтди. У бу ҳақда Ўзбекистоннинг Беларусдаги элчиси Раҳматулла Назаров билан учрашувда маълум қилди.
“Бизда кўплаб ўзбеклар яшайди. Беларусда яшашни ва ишлашни хоҳлашади. Улар ўзимизнинг одамлар. Биз катта мамнуният билан, айниқса, оилали инсонларни ўз уйимизга таклиф этамиз. Афсуски, бизда аҳолининг ўсиши сизлардаги каби эмас. Шунинг учун меҳнаткаш ўзбеклар бу ерга келишга қарор қилса, доим хурсанд бўламиз”, деди Лукашенко.
У Беларусда мигрантларни қабул қилиш борасида қатъий тартиб борлигини таъкидлади:
“Эҳтимол, бу ерга келганлар учун ҳам яхшироқдир. Улар биз одамларни муайян ишга олаётганимизни яхши билади. Уларга барча имкониятларни яратиб беряпмиз, фарзандларига хизмат кўрсатяпмиз — ясли, боғча, мактаб, олий таълим. Беларуслар, руслар, украинлар ва бошқалар билан тенг шароитда. Марҳамат, келинг, рақобатлашинг”, дея таъкидлади Беларусь президенти.
Лукашенко мамлакатда яшаш ва ишлаш учун имкониятлар кенг эканини айтди.
“Одамлар мамнуният билан келади ва ишлайди.. Шунинг учун бу борада ўзбекистонлик биродарларимиз билан ишлашга тайёрмиз. Улуғ Ватан уруши йилларида беларуслар учун анча-мунча ишлар қилганингизни биламиз. Кўплаб одамларимиз Ўзбекистондан бошпана топди, уларга инсоний муносабатда бўлинди. Бу борада биз сизлардан бир оз қарздормиз. Гарчи бу бир мамлакат доирасида бўлган бўлса-да”, дея хулоса қилди у.
Лукашенко элчи билан учрашувда Ўзбекистонга атом электр станцияси (АЭС) қурилишида беларуслик мутахассислар ёрдам бериши мумкинлигини айтган. У Беларусь АЭС қурилиши бўйича зарур тажрибани россиялик мутахассислар билан ҳамкорликда орттирганини таъкидлаган.
“Атом станциясини қуриш бўйича мутахассисларимизга қизиқишингиз борлигини биламиз. Биз бундай тажрибани россияликлар билан ҳамкорликда ўзлаштирдик. Ҳозирда россияликлар билан дунёнинг турли нуқталарида атом энергия блоклари қурилаётган лойиҳаларда бирга ишлаяпмиз”, деган Лукашенко.
