Кеча, 1 июль куни Таиландни тарк этиши керак бўлган икки Ўзбекистон фуқароси Пукет халқаро аэропортида божхона ходимлари томонидан юклари ичига яширилган 26 килограммдан ортиқ каннабис билан ушланди. Шундан сўнг улар ҳибсга олинган. Бу ҳақда “Thaiger” хабар берди.
Қайд этилишича, Пукет халқаро аэропорти божхона ходимлари тегишли идоралар билан ҳамкорликда багажларни текшириш пайтида бир нечта чамадонлар ичига яширилган қуритилган каннабис гуллари, каннабис смоласи ва қайта ишланган каннабис маҳсулотларини аниқлаган.
Божхона расмийларининг маълум қилишича, ушбу шахслар каннабис маҳсулотларини зарур божхона тартиб-таомилларидан ўтказмасдан Таиланддан олиб чиқиб кетишга уринганликда айбланмоқда.
Биринчи гумонланувчи, 26 ёшли Ж.Б. нинг жами тўртта юки орасидан иккита шубҳали чамадон ажратиб олинган. Текширув натижасида у ердан қадоқлари билан биргаликда умумий вазни 9,8 килограмм бўлган 30 та вакуумли пакетдаги қуритилган каннабис гуллари, шунингдек, вазни 1,03 килограмм бўлган 14 та қайта ишланган каннабис плиткалари топилган.
Иккинчи гумонланувчи, 26 ёшли М.Н. нинг ҳам юклари кўздан кечирилган. Божхона ходимлари унинг юклари орасидан вазни 9,8 килограмм бўлган 30 та қуритилган каннабис гуллари пакетини, вазни 4,1 килограмм бўлган саккизта қопчада каннабис смоласини ҳамда қадоқлари билан ҳисоблаганда умумий вазни икки килограмм бўлган битта пакет, бешта плитка ва тўққизта блокдан иборат қайта ишланган каннабис маҳсулотларини топган.
Гумонланувчиларга дастлаб 2017 йилдаги Божхона қонунига биноан божхона тартиб-таомилларини бажармасдан қиролликдан товарларни олиб чиқишга уриниш айби қўйилган.
Шунингдек, расмийлар Таиланднинг гиёҳвандлик воситалари тўғрисидаги қонунчилиги ҳамда Соғлиқни сақлаш вазирлигининг назорат қилинадиган ўсимликлар (шу жумладан, каннабис) бўйича кўрсатмалари бузилганини даъво қилмоқда.
“Amarin TV” хабарига кўра, ҳибсга олингандан сўнг ходимлар кейинги қонуний чораларни кўриш учун ҳар икки гумонланувчини ва мусодара қилинган ашёларни Саху полиция маҳкамаси терговчиларига топширган.
Божхона департаментининг билдиришича, Таиланддан каннабисни ноқонуний олиб чиқиб кетишга уриниш жиноий жавобгарликка сабаб бўлади. Қонунбузарлар содир этилган жиноят тури ва суд қарорига қараб, каннабиснинг ҳар бир килограмми учун 30 000 бат миқдорида жарима ёки озодликдан маҳрум қилиш жазосига тортилиши мумкин.
