Таиланд ҳарбий-ҳаво кучлари 26 декабрь куни Камбоджа билан баҳсли чегара ҳудудига авиазарбалар берди. Бу вақтда ҳар икки давлат расмийлари қуролли тўқнашувларга чек қўйиш мақсадида музокараларни давом эттираётган эди. Бу ҳақда BBC хабар берди.
Таиланд Ҳарбий-ҳаво кучлари зарбалар ҳудуддаги тинч аҳоли вакиллари чиқиб кетганидан сўнг, Камбоджанинг “мустаҳкамланган ҳарбий позицияси”га берилганини маълум қилди. Таъкидланишича, ушбу операция Нонг Чан қишлоғини назорат қилишга қаратилган бўлиб, самарали ва муваффақиятли якунланган.
Ўз навбатида, Камбоджа Мудофаа вазирлиги Таиландни тинч аҳоли уйларига “тартибсиз ҳужумлар” уюштиришда ва бир неча кишини жароҳатлашда айблади. Вазирликнинг Facebook’даги саҳифасида қайд этилишича, ҳужумлар мамлакат шимоли-ғарбидаги Бантай-Манчей провинциясида юз берган ва Ф-16 қирувчи самолётлари томонидан 40 тага яқин бомба ташланган.
Июль ойидаги беш кунлик шиддатли тўқнашувлардан сўнг ўрнатилган сулҳ декабрь ойи бошида яна бузилди. Ҳарбий ҳаракатлар қайта бошланганидан бери камида 41 киши ҳалок бўлди, 1 миллионга яқин аҳоли ўз уйини тарк этишга мажбур бўлди. Шунингдек, тўқнашувлар 800 километрлик чегара бўйлаб деярли барча провинцияларга ёйилди. Ҳар икки давлат сулҳнинг бузилишида бир-бирини айбламоқда.
Ҳозирда АҚШ ва Хитой янги сулҳ шартномаси бўйича воситачилик қилишга уринмоқда. Таиланд ва Камбоджа вакиллари чегара назорат пунктида учинчи кундирки музокаралар ўтказмоқда. Эртага, 27 декабрь куни жараёнга ҳар икки давлат мудофаа вазирлари қўшилиши кутилмоқда. Таиланд Бош вазири Анутин Чарнвиракул 26 декабрь куни томонлар шартларга келишса, ўт очишни тўхтатиш битими имзоланиши мумкинлигини айтди.
“Умид қиламанки, бу сафарги имзоланадиган оташкесим охиргиси бўлади ва ҳудудда тинчлик ўрнатилиб, одамлар ўз уйларига қайтади”, деди ҳукумат раҳбари.
Таиланд ва Камбоджа ўртасидаги чегара можароси бир асрдан ортиқ тарихга эга бўлиб, йиллар давомида вақти-вақти билан аскарлар ва тинч аҳоли ўлимига сабаб бўладиган тўқнашувлар билан давом этиб келмоқда.
