Андижон вилоятида товламачилик орқали пул ишламоқчи бўлган жиноий гуруҳ аниқланди. Бу ҳақда вилоят Ички ишлар бошқармаси хабар берди.
Қайд этилишича, жорий йилнинг 18 февраль куни 2000 йилда туғилган фуқаро ўзининг Nexia 3 русумли автомашинасида ўзига таниш бўлган йигит билан унинг севган қизини ўқишдан олиш учун Андижон давлат университети томон кетаётган пайтда бир аёл иштирокида йўл-транспорт ҳодисаси содир бўлган.
Жабрланган шахс ушбу вазиятдан ғаразли мақсадда фойдаланишга қарор қилиб, ўзига таниш бўлган икки нафар аёл билан жиноий режа тузган. Бу қинғир режага кўра, аёл билан содир бўлган йўл-транспорт ҳодисасига гўёки йигитнинг айбдор эканлиги кўрсатилиб, унга нисбатан руҳий босим ўтказиш бошланган.
Гуруҳ аъзолари кўнгилсиз ҳолат оқибатида жабрланган аёлга анча миқдорда харажат қилишганлигини рўкач қилишиб, бунинг эвазига йигитдан 550 АҚШ доллари талаб қилган. Агар келишилган пул маблағлари берилмаса, йигит va унинг севгилисини уйга бориб шарманда қилиш вa улар ҳақида турли уйдирмалар тарқатиш билан қўрқитган.
Ўтказилган тезкор тадбирда жиноий гуруҳ аъзолари талаб қилинган 550 АҚШ доллари миқдордаги пулларни олаётган пайтда тадбир иштирокчилари томонидан ашёвий далиллар билан қўлга олинган.
Ҳозирда ушбу шахсларга нисбатан Жиноят кодексининг 165-моддаси (товламачилик) 2-қисми “в” банди билан жиноят иши қўзғатилиб, тергов ҳаракатлари бошланган.
