Ўзбекистонда ижтимоий реестрга кирмаган оилалар фарзандларига ҳам ташаббусларини реализация қилиши учун 41 миллион сўмгача субсидия берилиши режалаштирилмоқда.
Президент раҳбарлигидаги 12 февраль кунги йиғилишда ёшларни қўллаб-қувватлаш мақсадида Ижтимоий реестрга кирмаган оилаларнинг иқтидорли фарзандларига ҳам спорт, маданият ва санъат соҳасидаги ташаббуслари учун “Ёшлар дафтари” жамғармасидан 41 миллион сўмгача субсидия бериш таклиф қилинди. Давлат раҳбари ушбу тартибни Андижон вилоятидан бошлашни топширди.
Вилоятда 11 та олий таълим муассасаси фаолият юритмоқда, 94 мингдан ортиқ талаба таҳсил олмоқда, 56 та техникумда 46 минг нафар ўқувчи касбларга ўргатилмоқда. Олийгоҳлардаги илмий салоҳиятни ошириш, дуал таълим қамровини кенгайтириш чоралари белгилаб олинди.
Тиббиёт техникумларига тил ўргатиш бўйича илғор хусусий таълим ташкилотларини жалб қилиб, йилига 4 мингдан зиёд ёшларнинг Европа давлатларига ишлашга боришига кўмаклашиш ташаббуси қўллаб-қувватланди.
Бундан ташқари, жорий йилда пахтачиликда ҳосилдорликни ошириш мақсадида хорижий навлар жойлаштириладиган ва илғор “76х10” схемаси асосида экиладиган пахта майдонларини кенгайтириш, 472 дона янги техника харид қилиш режалаштирилган. 2 минг гектар кам самарали эски боғлар интенсив боғларга айлантирилади, 6,8 минг гектар ер фойдаланишга қайта киритилади.
Янги тажриба сифатида Олтинкўлда гулчилик, Избосканда кўчатчилик, Асакада иссиқхоначилик, Қўрғонтепада сабзавотчилик, Булоқбошида узумчилик бўйича томорқа мактаблари ташкил этилади.
2025 йилда вилоятга 460 минг хорижий ва 1,8 миллион маҳаллий турист келган. Жорий йилда хорижий туристлар сонини 700 мингга, маҳаллий сайёҳларни эса 2,5 миллионга етказиш мақсад қилинган.
Шу мақсадда Булоқбошидаги “Ширмонбулоқ”, Хўжаободдаги “Имом ота” ва Хонободдаги туризм марказларини ривожлантириш учун алоҳида дирексия очилади. Туман ва шаҳар марказларидаги 91 та маҳаллани боғловчи гавжум кўчаларда савдо, дам олиш ва кўнгилочар масканлар барпо этилади.
Андижонда уй-жой масаласи бошқа ҳудудларга нисбатан анча долзарб. Жорий йилда вилоятдаги “Янги Ўзбекистон” массивларида 54 та, бошқа ҳудудларда эса 158 та кўп қаватли уйлар қурилиши кутилмоқда.
“Қурилишга тайёр ер” тизимини жорий этиш орқали лойиҳаларни бошлаш муддатини 120 кундан 30 кунгача қисқартириш мумкинлиги кўрсатиб ўтилди. Жалақудуқда ушбу янги тизим асосида замонавий уй-жойлар қуриш бўйича тажриба бошланади.
Давлат раҳбари йиғилиш якунида белгиланган вазифалар ижроси Андижон аҳолиси ҳаётида аниқ ва сезиларли натижа бериши шартлигини таъкидлаб, мутасаддиларга тегишли топшириқлар берди.
