Россиянинг Санкт-Петербург шаҳрида яшаб келаётган Ўзбекистон фуқароси ва унинг уч нафар вояга етмаган фарзандининг мураккаб вазияти ижобий ҳал этилди. Бу ҳақда “Дунё” хабар берди.
Аниқланишича, ўзбекистонлик фуқаро Р.З. 2020 йилда ишлаш учун Санкт-Петербургга борган. 2020–2025 йиллар оралиғида у уч бор фарзандли бўлган. Бироқ мураккаб ҳаётий вазият туфайли болаларнинг туғилганлик тўғрисидаги гувоҳномалари ўз вақтида расмийлаштирилмаган. Шу сабабли болаларнинг шахсни тасдиқловчи ҳужжатлари бўлмаган. Бу эса уларни вақтинча давлат идоралари қарамоғига олиш ва вояга етмаганлар учун ихтисослаштирилган муассасага юборишга сабаб бўлган.
Ўзбекистоннинг Санкт-Петербургдаги бош консулхонаси томонидан олиб борилган саъй-ҳаракатлар натижасида дипломатлар вазиятга зудлик билан аниқлик киритиб, фуқароларнинг ҳуқуқларини ҳимоя қилиш бўйича комплекс чора-тадбирлар амалга оширилган.
Ўзбекистонликлар иши Санкт-Петербургнинг Василеостровский туман судида кўриб чиқилган. Суд жараёнида бош консулхона ходимлари томонидан болаларнинг шахсини ва қариндошлик алоқаларини тасдиқловчи ҳужжатлар тақдим этилиб, тегишли идоралар билан тушунтириш ишлари олиб борилган. Судда фуқаро манфаатлари ҳимоя қилиниб, болаларни оила муҳитига қайтариш зарурлиги асослаб берилган.
Судда ижобий қарор қабул қилганидан сўнг она ва унинг фарзандлари Ўзбекистонга қайтарилган.
