Ижтимоий тармоқларда Тошкент шаҳрида маст ҳолда йўл-транспорт ҳодисаси содир этган ҳайдовчи йўл-патруль хизмати ходимига қўл кўтаргани акс этган видео тарқалди. Мазкур ҳолат юзасидан Йўл ҳаракати хавфсизлиги хизмати муносабат билдирди.
Қайд этилишича, жорий йилнинг 30 март куни тунда Тошкент шаҳар Яшнобод туманидаги кўчаларнинг бирида Malibu ва Leapmotor автомашиналари иштирокида тўқнашув содир бўлган. Leapmotor ҳайдовчиси тортишув юзага келгани учун 102 рақамига қўнғироқ қилган ва давлат рақам белгисига эга бўлмаган Malibu ҳайдовчиси “авария” содир этиб, унга нисбатан қўполлик қилаётганини билдирган. Мурожаатга асосан тезкорлик билан воқеа жойига етиб борган йўл-патруль хизмати ходимлари ҳолатни расмийлаштириш чоғида маст ҳолатда машина бошқарган Malibu ҳайдовчисига алкотестер орқали текширувдан ўтишни таклиф қилган. Ходимларнинг қонуний талабига бўйсунмаган ҳайдовчи уларга фаол қаршилик кўрсатиб, мушт туширишгача борган.
“Фуқаро ходимларни сўкиб, ҳақорат қилаётган экан. Кейин биз уни жамоат жойида юриш қоидаларини бузаётганлиги, ходимларга бўйсунмаётганлиги учун тушунтириш ишларини олиб бордик. Биз билан ички ишлар бўлимига кетишини тушунтирганимизда даб-дурустдан менга битта муш тушириб қолди”, дейди ЙПХ ходими.
Ҳодисани содир этган эркак қилган ишидан пушаймон эканини билдирган.
“Leapmotor автомашинасини туртиб олдим. Тўхтаб нима бўлди экан деганимизда, кайфлигим сабабли у билан ғижиллашганимда, 102 га қўнғироқ қилиб, “ГАИ”ларни чақирганди. Шу билан бирга ППС ходимлари ҳам келганди. Ичганлигим сабабли қўлим кўтарилиб кетди. Қилган ишимдан мингдан минг пушаймонман, ички ишлар ходимларидан узр сўрайман. Бу ҳол бошқа такрорланмайди. Қонун муқаррар экан, мана жавоб беришга келиб турибмиз”, дейди Malibu ҳайдовчиси.
Ҳозирда ҳайдовчи процессуал тартибда ушланиб, унга нисбатан Яшнобод тумани прокуратураси томонидан Жиноят кодексининг 219-моддаси 2-қисми (ҳокимият вакилига ёки фуқаровий бурчини бажараётган шахсга қаршилик кўрсатиш), 277-моддаси 3-қисми “г” банди (безорлик) билан жиноят иши қўзғатилган.
Ушбу шахснинг қонунбузарликларидан жабрланган фуқаролардан яқин орадаги ички ишлар бўлимига ёки 102 рақамига мурожаат қилиш сўралади.
