Грузиядаги ягона нефтни қайта ишлаш заводи – Black Sea Petroleum (BSP) компанияси Россия нефтини қайта ишлашни тўлиқ тўхтатиб, Туркманистон хомашёсига ўтади. Бу ҳақда корхона бош директори Давид Поцхверияга таяниб, “Business Media” нашри хабар берди.
Поцхвериянинг сўзларига кўра, кейинги босқичда компания Қозоғистондан нефть етказиб беришни йўлга қўйишни режалаштирмоқда. Бу маҳсулотни Европа Иттифоқи мамлакатларига экспорт қилиш имконини беради.
“Биз Россия нефтини тўлиқ Туркманистон, сўнгра Қозоғистон ва бошқа мамлакатлар нефтига алмаштирамиз, бу бизга маҳсулотни ЕИга экспорт қилиш имкониятини беради”, дейди Поцхверия.
Унинг тушунтиришича, бу қарор Европа Иттифоқига Россия нефть маҳсулотларини импорт қилиш бўйича амалдаги чекловлар билан боғлиқ. Бироқ, Туркманистон нефтини қайта ишлаш Озарбайжон ҳудуди орқали транзит масалалари ҳал этилганидан кейингина бошланади.
“Биз бу борада анчадан бери ишлаяпмиз. Афсуски, ҳамкоримиз ва дўстимиз – Озарбайжон ҳудуди орқали темир йўл транзитини ташкил этишда қийинчиликлар юзага келди. Гап бир неча ой олдин келишувга эришилган Туркманистон нефти ҳақида кетмоқда, аммо етказиб бериш кечикмоқда. Шунга қарамай, яқин орада масала ҳал бўлишига ва ушбу логистика занжирини фаоллаштиришимизга умид қиламиз, шундан сўнг Қозоғистон нефти ҳам келади”, дейди Поцхверия.
Жорий йил март ойи бошида Европа Иттифоқи Россия нефтини импорт қилгани ва қайта ишлагани учун BSP компаниясини дастлабки санкциялар рўйхатига киритган. Бунга ўтган йилнинг октябрь ойида “Русснефть” компанияси Кулеви портига қайта ишлаш учун 105 минг тонна хом ашё етказиб бергани сабаб бўлган. Грузия мухолифатининг мурожаатидан сўнг ЕИ Тбилисидан тушунтириш талаб қилди. Кейинчалик, Грузия ҳукумати Россия нефтидан тўлиқ воз кечиш ҳақида ишонтиргач, BSP санкциялар рўйхатидан чиқарилди.
Кулевидаги нефтни қайта ишлаш заводи ўтган йилнинг декабрь ойида ишга туширилган. Унинг ҳозирги қуввати йилига 1,2 миллион тонна нефть маҳсулотларини ташкил этади ва уни 4,5 миллион тоннагача ошириш имконияти мавжуд.
BSP халқаро ҳамкорлари орасида Saudi Aramco ва Trafigura компаниялари бор. Ҳозирда корхона мазут ва дизель ёқилғиси ишлаб чиқармоқда. Режада “Евро-5” стандартидаги бензин, авиация ёқилғиси ва евродизель ишлаб чиқаришни йўлга қўйиш ҳамда уларни экспорт қилиш кўзда тутилган.
