Қозоғистон Президенти Қосим-Жомарт Тўқаев 18-20 декабрь кунлари Японияга расмий ташриф билан боради. Бу ҳақда Қозоғистон етакчисининг матбуот хизмати хабар берди.
Маълум қилинишича, ташриф доирасида Тўқаев Япония императори Наруҳито, бош вазир Санаэ Такаичи ҳамда Япония ишбилармон доиралари вакиллари билан учрашувлар ўтказади.
Шунингдек, Қозоғистон Президенти “Марказий Осиё – Япония” саммитида иштирок этади.
Саммит дастлаб 2024 йил август ойида Қозоғистонда ўтказилиши режалаштирилган, аммо Японияда Тинч океани соҳилида мега зилзила хавфи юзага келиши муносабати билан фавқулодда тайёргарликлар сабаб бекор қилинган эди.
Япония ушбу саммит орқали Марказий Осиё билан дипломатик ва иқтисодий алоқаларни мустаҳкамлашни мақсад қилган. Саммитда минтақавий хавфсизлик, савдо ва инвестиция имкониятлари бўйича музокаралар ўтказилиши кутилмоқда. Япон расмийлари ушбу тадбирни глобал давлатларнинг минтақага таъсирини мувозанатлаш имконияти сифатида кўрмоқда.
Меҳмон раҳбарлар учун тартиб ва протоколни таъминлаш бўйича тайёргарликлар олиб борилмоқда.
