9 сентябрь куни Apple корпорацияси iPhone 18 Pro ва 18 Pro Max моделларини намойиш қилди. Тақдимот трансляцияси компания веб-сайтида олиб борилмоқда.
Смартфон ўтган йилги модель каби дизайнга ва алюминий корпусга эга. Корпуснинг янги ранглари ва кичрайтирилган Face ID модули асосий фарқлардан бири бўлган. Смартфон кумушранг, қора, мовий ва тўқ қизил рангларда сотувга чиқади.
iPhone 18 Pro 2 нанометрли техпроцесс асосида яратилган янги Apple A20 Pro чипига эга. Компаниянинг маълум қилишича, у ўтган йилги A19 Pro’га қараганда 20-40 фоизга тезроқ ишлайди. Шунингдек, Apple “тарихдаги энг узоқ вақт қувват сақлайдиган iPhone” ишлаб чиқилганини маълум қилди.
Смартфонлар 48 мегапикселли янгиланган камераларга эга бўлди: асосий сенсорда сенсорга тушадиган ёруғлик миқдорини назорат қилиш учун ўзгарувчан диафрагма пайдо бўлди. Ёруғлик кучи саҳнага қараб автоматик равишда мослашади. “Камера” иловаси созламаларида кадрни қўлда созлаш имкониятлари кўпайган, жумладан, оқ ранг баланси ва диафрагмани созлаш функциялари қўшилган. Суратларнинг ҳақиқийлигини аниқлайдиган ва уларни сунъий интеллект томонидан яратилган тасвирлардан ажратиб берадиган Reference Image режими пайдо бўлган.
Смартфон нархи қимматлашди. iPhone 18 Pro’нинг 256 гигабайтли минимал версияси 1200 доллар, 18 Pro Max эса 1300 доллардан бошлаб сотилади. Таққослаш учун, аналогик модификациядаги 17 Pro ва Pro Max мувофиқ равишда 1100 ва 1200 доллар эди. Сотувлар жорий йил 18 сентябрдан бошланади.
iPhone 18 чиқиши билан бир вақтда компания iOS 27’нинг янги версиясини ҳам чиқаради. Операцион тизим 200 га яқин яхшиланишлар ва янгиланишларга эга бўлади, улар орасида ишшш тезлигининг ошиши ва янгиланган Siri овозли ёрдамчиси бор.
