Тошкент шаҳри ва вилоятида ўтказилган тезкор-қидирув тадбирлари натижасида интернет наркодўконнинг саккиз нафар йирик аъзолари ушланиб, улардан 219 килограмм кучли таъсир қилувчи моддалар топилди. Бу ҳақда ИИВ матбуот хизмати хабар берди.
Маълум қилинишича, Telegram’да 2023 йилдан буён гиёҳвандлик воситалари ноқонуний муомаласи билан шуғулланиб келган Ж.Муриддинов қўлга олинди. У оиласи билан яшаётган ижарадаги хонадонни наркоомборга айлантириб, 200 килограммдан ортиқ “Прегабалин” ва 10 килограммдан ортиқ “Тропикамид” кучли таъсир қилувчи дори воситаларини ўтказиш мақсадида сақлаб келган.
Telegram наркодўконида йилига 800 килограммгача кучли таъсир қилувчи дори воситаларини аҳоли орасида тарқатиб келган ҳамда яширин нарколабораторияларни прекурсорлар билан таъминлаб турган.
Жиноий ҳаракатларда омборчи сифатида ишлаган 1996 йилда туғилган Ш.Исломов яшаш хонадони ва автомашинаси текшириб кўрилганда, хонадонда нарколаборатория жиҳозлари ҳамда машина юкхонасида 6 килограмм “Прегабалин” ва 100 грамм “Тропикамид” кучли таъсир қилувчи дори воситалари борлиги аниқланиб, процессуал тартибда расмийлаштириб олинган.
1994 йилда туғилган А.Қурбоновнинг ҳам вазифаси катта миқдорда кучли таъсир қилувчи дори воситаларини сақлаш бўлган. Шунингдек, жиноий гуруҳ етакчиси бўлган Ж.М.га мўмай даромад эвазига “закладчик” сифатида ишлаб келган З.Абдурасулов, С.Ғиёсов ва С.Муродов 2000 дан ортиқ психотроп дори воситаларини жойларга тарқатаётган вақтда қўлга олинган.
Мазкур ҳолат юзасидан жиноий гуруҳ аъзоларига нисбатан Жиноят кодексининг 251-1-моддаси (гиёҳвандлик воситалари, уларнинг аналоглари ёки психотроп моддалар ҳисобланмайдиган кучли таъсир қилувчи моддаларни тарғиб қилувчи маҳсулотни тайёрлаш, тарқатиш, реклама қилиш, намойиш этиш ёки бундай моддаларни ёхуд заҳарли моддаларни қонунга хилоф равишда муомалага киритиш) бешинчи қисми билан жиноий иш қўзғатилиб, қамоққа олинган.
Ушбу шахслардан жабр кўрган фуқаролардан ички ишлар органларига мурожаат қилишлари сўралди.
