Centrum Air’нинг Тошкент—Гуанчжоу—Тошкент йўналишида қатновчи самолётини чақмоқ урди. Бу ҳақда 18 май куни авиакомпания матбуот хизмати хабар берди.
Маълум қилинишича, 16 май куни шу йўналишдаги рейсни амалга ошириш вақтида самолётни чақмоқ урган. Хавфсизлик талаблари ва амалдаги авиация стандартларига мувофиқ, ҳаво кемаси ҳар томонлама техник кўрикдан ўтказиш, диагностика ва зарур тиклаш ишларини олиб бориш учун зудлик билан парвозлардан четлаштирилган.
Текширув якунларига кўра, авиакомпания томонидан ушбу йўналишдаги самолётни алмаштириш тўғрисида қарор қабул қилинган.
Ҳодиса C6511D/C6512D Тошкент—Гуанчжоу—Тошкент рейсининг кечикишига сабаб бўлган. Мажбурий кутиш даврида рейснинг барча йўловчилари меҳмонхонага жойлаштирилган ва уч маҳал овқат билан таъминланган.
