Туркиянинг Маниса вилояти Солиҳли туманида фоҳишахона ташкил қилган ўзбекистонлик аёл қўлга олинди. Бу ҳақда DHA хабар қилди.
Қайд этилишича, туманда ўтказилган фоҳишаликка қарши операция давомида чет эл фуқароси бўлган 2 аёл қўлга олинган, уларга воситачилик қилган бир шахс эса ҳибсга олинган.
Туман ички ишлар бўлимининг жамоат тартибини сақлаш гуруҳи томонидан олиб борилган тезкор тадбирлар натижасида Ўзбекистон фуқароси бўлган 41 ёшли У.Й. Кожачашма маҳалласидаги манзилда 2 минг лира (тахминан 546 000 сўм) эвазига фоҳишалик фаолиятини ташкил қилгани аниқланган.
Белгиланган манзилда ўтказилган рейдда Қирғизистон фуқаролари – 35 ёшли A.И. ва 37 ёшли Г.Д. қўлга олинган.
Ички ишлар органларидаги текширувлардан сўнг чет эл фуқароси бўлган аёллар депортация қилиш мақсадида махсус қайтариш марказига юборилган.
У.Й. эса “фоҳишаликка воситачилик қилиш ва жой таъминлаш” айбловлари билан ҳибсга олиниб, қамоқхонага жўнатилган.
