Қозоғистоннинг Бойқўнғир космодромида 27 ноябрь куни авария юз берди. Ҳодиса Россия уч нафар астронавтни “Союз МС-28” космик кемасида Халқаро космик станцияга учиргач содир бўлган. Бу ҳақда Тhе Insider хабар берди.
Парвоздан кейинги текширувда ракетанинг биринчи босқич двигательидан чиққан кучли газ оқими 31-майдончадаги 6-учириш мажмуасининг бир қисмини узиб кетгани аниқланган. Гап хизмат кўрсатиш кабинаси ҳақида бормоқда. Бу старт иншооти остида жойлашган ҳаракатланувчи техник конструкция бўлиб, ракетанинг орқа қисми билан боғлиқ ишлар — коммуникацияларни улаш, двигательларни ишга тушириш учун пиротехник мосламаларни ўрнатиш — айнан шу ерда амалга оширилади.
Кабинадаги иш майдончалари устунлар бўйлаб поршенлар ёрдамида кўтарилади ва туширилади. Учиришдан олдин эса у йиғилиб, рельслар орқали махсус жойга четлаштирилади. Ташқи томондан уни металл ҳимоя пардаси ёпади, бу парда тахминан 2000°C ҳароратдаги реактив чиқинди газ таъсирига учрайди.
Авария оқибатида экипаж аъзолари жароҳатланмаган, бироқ старт мажмуаси таъмирлашга муҳтож. Шунингдек, реактив оқим кабел-ёнилғи устунларидан бирини узиб кетган. Ҳозирда Россиянинг бошқа захира учириш майдончалари мавжуд эмас, қолганлари фақат юк ташувчи миссиялар учун мўлжалланган.
Мутахассисларнинг баҳолашича, старт майдончасини тиклаш ишлари икки йилгача чўзилиши мумкин. Бироқ “Роскосмос” шикастланишлар “яқин вақт ичида” бартараф этилишини маълум қилган.
