Россия Президенти Владимир Путин Франция раҳбари Эммануэль Макрон билан мулоқотга тайёр. Бу ҳақда Путиннинг матбуот котиби Дмитрий Песков РИА Новости нашрига берган интервьюсда сўз очди.
Песковнинг айтишича, Макрон Путин билан суҳбатлашишга тайёр эканини билдирган. Шу муносабат билан у Президент Путиннинг тўғридан тўғри мулоқот чоғида айтган сўзларини эслатиб ўтган. Путиннинг ўзи ҳам Макрон билан диалог олиб боришга тайёрлигини билдирган. Песковнинг таъкидлашича, агар ўзаро сиёсий ирода мавжуд бўлса, буни фақат ижобий ҳолат сифатида баҳолаш мумкин.
Бир неча соат ўтиб, Макрон администрацияси Москванинг мулоқотга тайёрлигини олқишлаган ва яқин кунларда кейинги ҳаракатларни амалга оширишнинг энг мақбул йўлини танлаш бўйича қарор қабул қилинишини билдирган.
Шу билан бирга, Елисей саройида Россия билан олиб бориладиган ҳар қандай музокаралар Украина Президенти Владимир Зеленский ва Европадаги иттифоқчилар учун “тўлиқ шаффофлик” шароитида ўтказилиши таъкидланган.
Макрон 19 декабрь куни Путин билан суҳбатни Европа учун қайта тиклаш фойдали бўлиши мумкинлигини айтган эди. Унинг фикрича, европаликлар бунга эришиш йўлларини яқин ҳафталар ичида топиши лозим.
Июль ойида Макрон ва Путин уч йил ичидаги илк телефон суҳбатини ўтказган. Унинг давомида Украинадаги ҳарбий ҳаракатлар, шунингдек, Эрон ва Исроил ўртасидаги уруш масалалари муҳокама қилинган.
