Доминикан Республикасидаги аэропортда Gulfstream G200 хусусий самолёти қулаб тушди. Ҳаво кемасининг двигательлари ёниб кетган ва учувчилар ҳалок бўлган.
АҚШда рўйхатдан ўтган самолёт Пуэрто Рикодан Доминикан Республикасига етиб келган. Ла-Романада ёнилғи қуйиб олгач, у чартер рейси билан Техасга учиши керак эди. Парвоздан бир неча дақиқа ўтгач, экипаж юзага келган муаммолар ҳақида хабар берган ва бу учувчини аэропортга шошилинч равишда қайтишга мажбур қилган. Бироқ қўнишга уриниш вақтида самолёт мувозанатни йўқотган ва аэропорт ҳудудига қулаб тушган. Фожиа содир бўлган вақтда бортда фақат учувчилар бўлган ва улар ҳалокат жойида вафот этган.
Доминикан Республикасининг авиация маъмурияти терговни бошлади, унинг доирасида экипаж аэропортга қайтишга уринишдан олдин хабар берган носозлик ўрганиб чиқилади.
Самолёт собиқ бейсболчи Ядиэр Молина ва унинг оиласи учун мўлжалланган эди. Молина Instagram саҳифасида ушбу фожиадан чуқур қайғуда эканини ва самолёт уни, оиласи ҳамда дўстларини олиб кетиш учун йўлда бўлганини ёзди.
43 ёшли Молина бейсбол тарихидаги энг яхши ҳимоячилардан бири сифатида тан олинган. У ўзининг бутун фаолиятини “Кардиналс” жамоасида ўтказган ва унинг таркибида тўрт марта Жаҳон сериясида иштирок этиб, икки марта ғолиб бўлган.
