Google’га эгалик қилувчи Alphabet компанияси тарихда биринчи марта йиллик даромади 400 миллиард доллардан ошганини қайд этди. Бу ҳақда The Verge нашри хабар бермоқда.
Таъкидланишича, бу 2025 йилнинг тўртинчи чораги учун молиявий ҳисоботда келтирилган, Google’нинг Cloud (Булут)бизнесининг кенгайиши ва YouTube’нинг ўсиши туфайли кўрсаткич йиллик ҳисобда 15 фоизга ошган.
Ҳисоботга кўра, Google’нинг Cloud бўлинмаси йиллик даромади 70 миллиард долларга етган, YouTube’нинг даромади эса реклама ва обуналар ҳисобига 60 миллиард доллардан ошган. Шунингдек, компания хизматларининг пулли обуначилари сони, жумладан, Google Оnе ва YouTube Premium фойдаланувчилари ҳам қўшилганда, 325 миллиондан ошгани маълум қилинган.
Бундан ташқари Gemini иловаси аудиториясида ҳам ўсиши кузатилган. Ноябрь ойида Gemini3 модели ишга туширилгандан сўнг бу кўрсаткич 750 миллион фойдаланувчидан ошган. Шу билан бирга, Google қидирув хизматидан фойдаланиш бўйича рекорд ўрнатилди ва СИ режими ишга туширилгандан бери кунлик сўровлар сони икки баробарга кўпайган.
Қайд этилишича, компания Gemini ва AI Моdе воситаларида автоматлаштирилган тўлов функциясини жорий этишни режалаштирмоқда.
