Ўзбекистон Президенти Администрацияси раҳбари Саида Мирзиёева АҚШ Савдо вазири ўринбосари Дэвид Фогел билан учрашув ўтказди. Бу ҳақда Мирзиёева ўзининг Telegram-каналида ёзиб қолдирди.
Маълум қилинишича, учрашувда Ўзбекистон ва АҚШ ўртасидаги ҳамкорлик, жумладан, савдо, инвестициялар ҳамда шерикликнинг янги йўналишлари хусусида фикр алмашган.
“Ҳозирда Америка бизнес доиралари мамлакатимиздаги инвестициявий ва инфратузилмавий лойиҳаларга тобора катта қизиқиш билдирмоқда. Ушбу эътибор яқин истиқболда аниқ келишувлар, янги иш ўринлари ва иқтисодиёт учун кенг имкониятларга айланиши жуда муҳим”, дейилади хабарда.
Суҳбат чоғида икки мамлакат тадбиркорлари ўртасида ўзаро манфаатли мулоқотни ва амалий алоқаларни йўлга қўйишга кўмаклашиб келаётган Америка–Ўзбекистон ишбилармонлик ва инвестиция кенгаши фаолияти алоҳида кўриб чиқилган.
Қайд этиш жоиз, жорий йилнинг 6 апрель куни АҚШнинг Вашингтон шаҳрида Америка–Ўзбекистон ишбилармонлик ва инвестиция кенгаши расман ўз фаолиятини бошлади. Бундан кўзланган мақсад – қўшма бизнес ташаббуслари учун мустаҳкам институционал асос яратиш. Унда Ўзбекистон Президенти Администрацияси раҳбари Саида Мирзиёева, АҚШ президентининг Жанубий ва Марказий Осиё бўйича махсус вакили, элчи Сержио Гор ҳамда Ўзбекистоннинг АҚШдаги элчихонаси маслаҳатчи-элчиси – Президент Администрациясининг АҚШдаги вакили Комил Алламжонов иштирок этганди.
