Россия авиацияси 2025 йил бошидан бери Россия ҳудуди ва босиб олинган Украина ҳудудларига камида 130 та авиабомба ташлаб юборган. Бу ҳақда Astra нашри хабар берди.
Маълумотларга кўра, улар орасида 123 та фугас авиабомба (FAB) ва 7 та универсал модулли бомба (UMPB) бор. Шунингдек, учта ракета ҳам нотўғри ҳудудга тушган. Сўнгги қайд этилган ҳолат босиб олинган Дебалцево шаҳрида содир бўлиб, у ерда FAB-500 бомбаси Горкий кўчасига тушган, маҳаллий аҳолига зарар етмаган.
Октябрь ўрталарида эса Россия бомбардимончи самолёти Саратов яқинидаги стратегик авиабаза ёнига фугал бомба ташлаб юборган. Украина армияси маълумотларига кўра, айнан шу аэродромдан Украина ҳудудига ракета зарбалари берилаётган самолётлар учирилади.
Astra ҳисоб-китобига кўра, 2024 йилда ҳам Россия назоратидаги ҳудудларга камида 165 та FAB тушган. Россия ҳарбийлари эски совет бомбаларини қайта жиҳозлаб, уларга йиғма қанотлар ва сунъий йўлдош навигация тизимлари ўрнатиб, уларни режалаштирувчи бомбаларга айлантирмоқда. Аммо амалда бундай “модернизацияланган” ўқ-дорилар тез-тез мўлжалланмаган жойларга тушмоқда.
Россия расмийлари бундай ҳодисаларни кўпинча яширади ёки айбни Украина Қуролли кучларига юклайди, дейилади хабарда.
Апрель ойида Белгород вилоятида ҳаракатланаётган автомобиль олдига Россия авиабомбаси тушганида, Россия Тергов қўмитаси “Украина армияси жиноятини текширяпмиз” дея баёнот берган.
Украина ҳарбий разведкасининг маълумотига кўра, Россияда режалаштирувчи бомбалар ишлаб чиқариш ҳажми ортиб бормоқда. Ноябрь ўрталарида Украинанинг Мудофаа вазирлиги Бош разведка бошқармаси бошлиғи ўринбосари, генерал-майор Вадим Скибицкий, 2025 йилда Россия 120 мингтагача шундай ўқ-дорилар ишлаб чиқариши мумкинлигини айтган.
Ҳозирда Россия қўшинлари ҳар куни Украина ҳудудига 200–250 та режалаштирувчи авиабомба учирмоқда; бир ой олдин бу кўрсаткич 170 тага яқин бўлган.
