Эстониянинг Россия билан чегараси яқинидан 250 килограммлик ҳаво бомбаси топилди. Бу ҳақда “Рostimees” хабар берди.
Маълум қилинишича, Россия чегараси яқинида жойлашган Ида-Вирумаа округидаги Аувере қишлоғида яшовчи фуқаро ўрмонда эрталаб сайр қилиш пайтида катта бомба топган.
Воқеа жойига етиб келган сапёрлар бу “уруш давридаги” ҳаво бомбаси экани ва унинг оғирлиги тахминан 250 килограммга етишини аниқлаган. Мутахассислар уни жойида йўқ қилишни режалаштиришмоқда. Йўқ қилишга тайёргарлик кўрилмоқда ва атрофдаги ҳудуд аҳолиси портлаш овозлари ҳақида огоҳлантирилган.
Маълумот учун, 1944 йилнинг ёзида Болтиқбўйи ҳужуми пайтида Аувере қишлоғи яқинида немис ва совет қўшинлари ўртасида жанглар бўлиб ўтган. Бомбалар уруш пайтида ишлатилган. Аммо бу бомбанинг 80 йил давомида очиқ ҳудудда туриши ҳаммани ҳайратлантирган.
