Франция Европадаги энг йирик атом авиаташувчини қуришни режалаштирмоқда. Уни 2038 йилда эксплуатацияга топшириш кўзда тутилган. Бу ҳақда кеча, 21 декабрь куни Франция Президенти Эммануэль Макрон Абу-Дабидаги ҳарбий базада франциялик ҳарбий хизматчилар олдида эълон қилди.
“Босқинчилар замонида биздан қўрқишлари учун кучли бўлишимиз керак. Мен Францияни янги авиаташувчи билан таъминлашга қарор қилдим”, дейди у.
Янги кеманинг сув сиғими қарийб 80 минг тоннани ташкил этади. Бу Франциянинг ҳозирги ягона атом авиаташувчиси – “Шарл де Голл”дан деярли икки баравар оғир дегани. Кутилишича, янги авиаташувчи 30 тагача жанговар самолётни ва 2 минг нафаргача экипаж аъзосини жойлаштира олади.
Франция Мудофаа вазири Катрин Вотреннинг маълум қилишича, янги авиаташувчини сафга киритиш 2038 йилга режалаштирилган.
Маълумот учун, Франция – Европа Иттифоқидаги ягона ядровий давлат бўлиб, авиаташувчиларга эга бўлган кам сонли Европа мамлакатларидан биридир (Буюк Британия, Италия ва Испания билан бир қаторда). Франциянинг йиллик мудофаа харажатлари 2030 йил охирига қадар икки баравар оширилиши режалаштирилган. Ҳозирда мамлакатнинг ҳарбий бюджети қарийб 50 миллиард еврони ташкил этади.
