Сурхондарё вилоятида пенсионерлардан ташкил топган гуруҳ наркотик моддаларини тарқатгани учун қўлга олинди. Бу ҳақда Ички ишлар вазирлиги хабар берди.
Маълум қилинишича, ўтказилган профилактик тадбир давомида уюшган наркожиноий гуруҳ фаолиятига чек қўйилган. Афғонистонлик фуқаро таъминотчи сифатида бир гуруҳ сурхондарёлик бўлган кекса ёшли фуқаролар билан ўзаро жиноий тил бириктириб, Термиз шаҳри ва тумани ҳудудларида наркокурьерлик қилиб, гиёҳвандлик моддаларини тарқатиш билан шуғулланиб келган.
Ўтказилган тезкор тадбирда гумонланувчилардан бири тўхтатилиб текширилганда, унинг ёнидан “опий” гиёҳвандлик моддаси борлиги аниқланган. Тадбир давомида ушбу моддаларни етказиб берган яна бир шахс ҳам аниқланиб, ундан махсус тадбир учун берилган пул маблағлари далиллий ашё сифатида расмийлаштириб олинган.
Тезкор тадбирлар давом эттирилиб, гуруҳнинг яна бир курьер аъзоси ушланган. Унинг ёнидан 5 грамм гиёҳвандлик моддаси аниқланган. Кейинги босқичда эса ушбу жиноий занжирнинг асосий бўғини фош этилган. Унинг яшаш хонадонида ўтказилган тезкор тадбирда жами 12 дона қадоқланган 12 граммдан ортиқ “опий” моддалари аниқланган.
Шунингдек, хонадонда гиёҳвандлик моддаларини истеъмол қилиш воситалари ҳам борлиги маълум бўлган. Мазкур жиноятни содир қилиб келган кимсалар ўзларининг айбларини яшириш мақсадида шерикларини ҳам фош қилган. Ҳозирда ушбу ҳолат юзасидан барча гумонланувчиларга нисбатан Жиноят кодексининг 276- (гиёвандлик воситалари, уларнинг аналоглари ёки психотроп моддаларни ўтказиш мақсадини кўзламай қонунга хилоф равишда тайёрлаш, эгаллаш, сақлаш ва бошқа ҳаракатлар) 273-моддалари (гиёвандлик воситалари, уларнинг аналоглари ёки психотроп моддаларни ўтказиш мақсадини кўзлаб қонунга хилоф равишда тайёрлаш, олиш, сақлаш ва бошқа ҳаракатлар қилиш, шунингдек уларни қонунга хилоф равишда ўтказиш) билан жиноят иши қўзғатилиб, қамоққа олиш эҳтиёт чораси қўлланилган.
