Швеция миграция қонунчилигини бузган 21 нафар Ўзбекистон фуқароси ватанга қайтарилди. Бу ҳақда “Дунё” ахборот агентлиги хабар берди.
Маълум қилинишича, 11 февралга ўтар кечаси Тошкент халқаро аэропортига қўнган чартер рейсда 21 нафар Ўзбекистон фуқароси бўлган. Улар Швецияга белгиланган кириш тартибини бузган ҳолда борган, кейинчалик мазкур давлат ҳудудида миграция қонунчилигига зид равишда бўлиб турган.
Уларни Тошкент аэропортида Ташқи ишлар вазирлиги ҳамда бошқа масъул идоралар вакиллари кутиб олган. Юртдошлар ватанга қайтишида кўрсатилган амалий ёрдам учун давлат раҳбарияти ва тегишли ташкилотларга миннатдорлик билдирган.
Қайд этилишича, мазкур рейс Ўзбекистон ва Швециянинг ваколатли органлари ўртасидаги ҳамкорлик доирасида ташкил этилган. Бу чора-тадбирлар хориждаги фуқароларнинг ҳуқуқ ва манфаатларини ҳимоя қилиш, шу билан бирга, ақабул қилувчи давлат қонунчилигига ҳурмат билан ёндашиш сиёсатининг амалий ифодаси экани таъкидланган.
