Ўзбекистоннинг 3 та ҳудудида 5 та қудуқдан газ чиқди, битта кон қайта тикланди. Бу ҳақда “Ўзбекнефтгаз” матбуот хизмати хабар қилди.
Қайд этилишича, Қорақалпоғистонда янги ва юқори босимли кон топилган, Қашқадарёда 3 та, Бухорда эса 1 та қудуқдан газ оқими олинган. Ҳозирда табиий газнинг дебити ҳамда таркиби аниқланмоқда.
Муборакда жойлашган “Янги Култак” конидаги 5 ва 10-сонли ишлаб чиқариш қудуқларининг ҳар биридан кунлик тахминан 245 минг метр куб, Шўртанда жойлашган “Марварид” конидаги 4-сон қидирув қудуғидан эса кунлик тахминан 450-500 минг метр куб бўлган табиий газ чиқиб турибди.
Шу билан бир қаторда, Устюрт ҳудудидаги ўз вазифасини бажариб бўлган “Шимолий Бердақ” конининг 7-сон қудуғи қайта таъмирланиб, ундан ҳам газ оқими олинган.
