Ўзбекистон олтин-валюта захиралари 2026 йил 1 июнь ҳолатига кўра, 70,58 млрд долларгача пасайди. Бу ҳақда Марказий банк маълумотларида келтирилган.
Мамлакатнинг ялпи халқаро захиралари ҳажми ўтган ойдаги кўрсаткичларга нисбатан 307,3 млн долларга камайди. Пасайишнинг асосий сабаби олтин захиралари қийматининг арзонлашиши бўлди. Хусусан, ой давомида олтин нархининг 4625,80 доллардан 4516,85 долларгача тушишининг таъсири 1,5 млрд долларни ташкил этди.
Таққослаш учун, 1 январда олтин-валюта захиралари 66,31 млрд долларни ташкил этган бўлса, март ойида захиралар ҳажми рекорд даражага — 77 млрд доллардан ошганди.
Мамлакат захираларидаги олтин қиймати 156,02 млн долларга пасайиб, 61,43 млрд долларни ташкил этди. Қиймат камайганига қарамай, олтиннинг физик ҳажми ошиб, 13,3 миллион троя унциясидан 13,6 миллион троя унциясигача кўпайди.
Шунингдек, захираларнинг валюта қисми ҳам камайди. Хорижий валютадаги маблағлар ҳажми 8,72 миллиард доллардан 8,57 миллиард долларгача тушди. Ушбу маблағларнинг асосий қисми хорижий банклардаги депозит ҳисобварақларида (5,72 миллиард доллар) сақланмоқда, қолган қисми эса хорижий эмитентларнинг қимматли қоғозларига (2,85 миллиард доллар) инвестиция қилинган.
