Россиянинг кеча, 26 июнь куни амалга оширган дрон ҳужумлари оқибатида Украинанинг Днепропетровск ва Суми вилоятларида камида уч киши ҳалок бўлди, яна бир неча киши жароҳат олди. Бу ҳақда мамлакат расмийларига таяниб, “Reuters” хабар қилди.
Днепропетровск вилояти губернатори Александр Ганжанинг маълум қилишича, Никополь шаҳрида микроавтобусга қилинган дрон ҳужуми оқибатида икки нафар йўловчи ҳалок бўлган. Губернаторнинг сўзларига кўра, ҳодиса оқибатида яна 12 киши жароҳат олган. Улар орасида икки нафар бола ҳам бор.
Суми вилоятида эса Россия билан чегарага яқин ҳудудда жойлашган қишлоққа дрон ҳужуми уюштирилган. Вилоят губернатори Олег Григоровнинг маълум қилишича, ҳужум оқибатида бир нафар эркак ҳалок бўлган.
Шунингдек, Запорожье вилояти губернатори Михаил Федоров Россиянинг кун давомидаги ҳужумлари оқибатида икки киши жароҳатланганини билдирган. Унинг айтишича, ҳужумлар кўп қаватли тураржой биноларининг фасадларига ҳам зарар етказган.
Қайд этилишича, Никополь шаҳри Днепр дарёсининг Россия назоратидаги Запорожье атом электр станциясига қарши соҳилида жойлашган бўлиб, тез-тез Россия ҳужумлари нишонга айланади.
