Россия президенти Владимир Путин 29 октябрь куни ҳарбий госпиталга ташрифи буюриб, Украинага қарши урушда қатнашганлар билан учрашди. Сиёсатчи россияликларнинг урушга мойиллиги “гени”да борлигини айтди.
Ҳарбийлардан бири суҳбат давомида архивлардан Улуғ Ватан уруши йилларида жанг қилган бобоси ҳақида маълумот топганини айтди. Путин бунга жавобан ҳарбий хизматчининг бош бармоғидан ушлади ва бир оз силтаб, шундай деди:
“Мана, қара, бобонг шундай бўлганини билмагандим, ўзинг эса бобонг каби жанг қиляпсан. Бу бизнинг генимизда бор, тушуняпсизми? Бизда бу бор ва у йўқолмайди”, деди Путин.
Таъкидланишича, Россия президенти госпиталда 127-алоҳида разведка бригадаси ҳарбий хизматчилари билан учрашган. Улар орасида камида икки нафар жиноий ўтмишга эга шахс бўлган. Жумладан, Рустем Иброҳимов ўғрилик ва ўлдириш билан қўрқитгани учун бир неча бор судланган. Босқин бошланишидан бир ҳафта олдин, 2022 йил 15 февралда у 20 минг рубльлик Инжилни ўғирлагани учун беш ойга колонияга ҳукм қилинган.
Учрашувнинг яна бир иштирокчиси эса 21 ёшли Владислав Бобко ҳисобланади. У 2023 йил июнь ойида полиция маълумотларида мулкни ўғирлашда гумонланувчи сифатида кўрсатилган. Ижтимоий тармоқда у “Влад Бандит” тахаллуси остида саҳифа юритади.
