Литва ҳукумати 27 ёшли россиялик рэпер Алишер Моргенштернга мамлакатга 10 йил давомида киришни тақиқлади. У 29 ноябрь куни Вильнюсда концерт бермоқчи эди. Бу ҳақда бугун, 13 ноябрь куни мамлакат Миграция департаменти вакили Рокас Пукинскасга таяниб, BNS агентлиги хабар берди.
Унинг сўзларига кўра, бу қарор Литва Ташқи ишлар вазирлигининг ёзма тавсияси ва “бу шахс миллий хавфсизликка таҳдид солиши мумкин” деган хулосага олиб келган қўшимча маълумотлар асосида қабул қилинган.
“А. Моргенштернга Литвага киришни тақиқлаш қарори дарҳол кучга киради ва 10 йил давом этади”, деди Пукинскас.
Шу билан бирга, Вильнюсдаги концерт учун чипталар ҳали ҳам сотилмоқда. BNS маълумотича, Вильнюс мэри Валдас Бенкунскас ҳам Ташқи ишлар вазирлигига мурожаат қилиб, Моргенштерн концертини ташкил этаётган Латвияда рўйхатдан ўтган Ready Events компанияси фаолияти мамлакат ахборот хавфсизлигига таҳдид солмаслигини текширишни сўраган.
Бенкунскас октябрь охирида Facebook саҳифасида шундай ёзган эди:
“Мен қўл қовуштириб ўтира олмайман ва Вильнюсга учинчи марта (Моргенштерн 2023 йил март ва 2024 йил декабрда бу ерда концерт берган) шундай ижрочи келаётганини кузата олмайман. У ‘Қрим кимники?’ деган саволга жавоб беролмайди, Путинни очиқ ҳурмат қилади ва Украина Маданият вазирлиги томонидан миллий хавфсизликка таҳдид солувчи шахслар рўйхатига киритилган”.
Россиялик рэпер 2020–2021 йилларда катта машҳурликка эришган — у “Легендарная пыль” альбoмини чиқарган ва америкалик рэпер Lil Pump билан Watafuk?! каби қўшиқларни ёзган. У интервьюларида сиёсий мавзулардан қочишга ҳаракат қилган. Масалан, 2021 йил августда украин журналисти Дмитрий Гордон билан суҳбатда “Қрим кимники?” деган саволга “Қрим — қримликларнинг” деб жавоб берган.
“Биз таъсир қила олмайдиган ўтмиш ҳақида баҳслашишнинг ҳожати йўқ”, деган у.
2021 йил ноябрида Россия Тергов қўмитаси раиси Александр Бастрикин Моргенштернни “ижтимоий тармоқларда гиёҳванд моддалар савдоси билан шуғулланишда” айблаган. Шу ортидан рэпер Россияни тарк этиб, Дубайга кўчган. 2024 йил январда у БАА ҳукумати унга мамлакатга киришни тақиқлаганини маълум қилган, аммо бунинг сабаблари очиқланмаган.
2022 йил 14 март куни – Украинадаги уруш бошланганидан бир неча ҳафта ўтиб —–Моргенштерн “12” номли қўшиқ ва клип чиқарган, унда украин журналисти Гордоннинг рус ҳарбийларига қаратилган ҳақоратли сўзлари ҳам келтирилган. 2022 йил май ойида Россия Адлия вазирлиги уни “фуқаролик жамиятига чет эл таъсири бўлган шахс” (иноагент) деб эълон қилган. Кейинчалик у бир неча бор тегишли белги қўймагани учун жаримага тортилган. 2024 йил сентябрида Моргенштернга нисбатан “иноагент мажбуриятларини бажармаслик” бўйича жиноят иши қўзғатилган ва у қидирувга берилган. 2025 йил январда эса Россияда унинг мол-мулки мусодара қилинган.
