Илон Маскка тегишли X (собиқ Twitter) ижтимоий тармоғидаги Grok сунъий интеллект боти аёллар ва вояга етмаган болаларнинг шаҳвоний мазмундаги сохта тасвирларини яратгани ортидан учта давлат ушбу платформага нисбатан кескин чоралар кўриш билан таҳдид қилди. Бу ҳақда The Independent хабар берди.
X платформасига ўрнатилган Grok боти фойдаланувчиларнинг сўровига биноан реал инсонлар, жумладан, аёллар ва болаларни кийимсиз ҳолда тасвирламоқда. Мазкур муаммо декабрь ойи охирида, ботга фойдаланувчиларга исталган расмни таҳрирлаш имконини берувчи edit imagе (расмни таҳрирлаш) тугмаси қўшилгандан кейин авж олди.
Малайзия ҳукумати Grok боти орқали аёллар ва болаларнинг тасвирларини ахлоқсиз кўринишга келтириш бўйича суриштирув бошлади. Маҳаллий ОАВнинг ёзишича, бот ҳатто малайзиялик аёлларнинг рўмолсиз (ҳижобсиз) ҳолатдаги сохта суратларини ҳам яратган. Малайзия алоқа ва мултимедиа комиссияси бундай контентни тарқатиш жиноят эканини ва X компанияси вакиллари тушунтириш бериш учун чақиртирилишини билдирди.
Илон Маскнинг муносабати
Дастлаб Илон Маск ушбу вазиятга киноя билан ёндашди. У ўзининг ва бошқа машҳур инсонларнинг бикини кийган ҳолда таҳрирланган суратларига кулаётган эможи билан жавоб қайтарди. Бироқ халқаро босим ортганидан сўнг 4 январь куни у позициясини ўзгартирди.
“Grok ёрдамида ноқонуний контент яратган ҳар қандай шахс, худди шундай контентни юклаган каби жазоланади. Бундай аккаунтлар бутунлай блокланади”, деб ёзган Маск.
Ҳиндистон ва Франциянинг кескин талаблари
Ҳиндистон ҳукумати X маъмуриятига расмий хат йўллаб, СИ ботини тўлиқ қайта кўриб чиқишни буюрди. Деҳли ушбу масалада кўрилган чоралар бўйича 72 соат ичида ҳисобот беришни талаб қилди. Акс ҳолда платформа жиноий жавобгарликка тортилиши мумкин.
Франция ҳам Grok ботини одамларнинг розилигисиз ноқонуний шаҳвоний контент яратишда айблади. Париж прокуратураси X платформасига нисбатан олиб борилаётган суриштирувни кенгайтириб, унга болаларга нисбатан зўравонлик контентини тарқатиш бўйича янги айбловларни қўшди. Шунингдек, ушбу ҳолат Европа Иттифоқининг Рақамли хизматлар тўғрисидаги қонунини бузиши мумкинлиги айтилмоқда.
Мутахассислар фикрича, сунъий интеллект томонидан яратилган сохта тасвирлар билан боғлиқ бу каби можаролар ижтимоий тармоқларни тартибга солувчи қонунларнинг янада қатъийлашишига олиб келади.
