Илон Маскка тегишли xAI сунъий интеллект компанияси 14 январь куни кечқурун Grok чат ботининг барча фойдаланувчилари учун тасвирларни таҳрирлаш имкониятини чеклаганини маълум қилди. Ушбу қарор сервис томонидан бутун дунё хавотирига сабаб бўлган шаҳвоний мазмундаги тасвирлар яратилгани ортидан қабул қилинди. Бу ҳақда Deutsche Welle хабар берди.
Европадан Осиёгача бўлган мамлакатлар ҳукуматлари сўнгги кунларда Grok томонидан яратилаётган порнографик контентга қарши курашиб, тақиқлар жорий этмоқда ва ноқонуний материалларни жиловлаш учун хавфсизлик чораларини талаб қилмоқда.
“Эндиликда бундай ҳаракатлар ноқонуний ҳисобланган юрисдикцияларда барча фойдаланувчилар, жумладан, пулли обуначилар учун Grok ва X платформаси орқали реал инсонларнинг ички кийим ва шунга ўхшаш кийимлардаги тасвирларини яратиш имконияти блокланди”, дейилади компания баёнотида.
Январь ойи бошида X ижтимоий тармоғида аёлларнинг шаҳвоний ҳолат ва позалардаги гипер реалистик суратлари кўпайиб кетди. Айрим ҳолатларда сунъий интеллект ёрдамида ҳатто вояга етмаганларнинг тасвирлари ҳам кийимсиз тасвирланиб, бу кенг жамоатчиликнинг кескин танқидига сабаб бўлди.
Париждаги AI Forensics нотижорат ташкилоти Grok томонидан яратилган 20 мингдан ортиқ тасвирни таҳлил қилиб, уларнинг ярмидан кўпида инсонлар “минимал кийимда” тасвирланганини аниқлади. Уларнинг аксарияти аёллар, 2 фоизи эса вояга етмаганлар экани маълум бўлди.
Калифорния расмийлари Маскдан жавоб талаб қилмоқда
АҚШнинг Калифорния штати губернатори Гевин Ньюсом ва штат бош прокурори Роб Бонта xAI компаниясидан тушунтириш талаб қилди. Бу Илон Маскнинг “Grok вояга етмаганларнинг яланғоч суратларини яратганидан хабарим йўқ” деган сўзларидан сўнг юз берди.
“Биз xAI компаниясидан бундай контент яратилиши ва тарқалишини тўхтатиш бўйича режалар юзасидан зудлик билан жавоб талаб қиламиз”, деб ёзди Роб Бонта ўзининг Х’даги саҳифасида.
Қонун чиқарувчилар ва ҳуқуқ ҳимоячилари Apple ва Google компанияларидан Grok иловасини ўз дўконларидан олиб ташлашни сўрамоқда. Дастлаб Маск бу вазият устидан кулиб, юмористик эможилар билан муносабат билдирган бўлса, кейинчалик X платформаси болалар жинсий эксплуатациясига оид материалларга қарши қатъий курашишини билдирди.
Дунё бўйлаб тақиқлар
Ҳозирча xAI чекловлар айнан қайси ҳудудларда жорий этилганини очиқламаяпти. Бироқ 10 январь куни Индонезия Grok’ни блоклаган биринчи давлат бўлди. Эртаси куни эса Малайзия ҳам ушбу чекловга қўшилди.
