“Long March 7A” ракета-ташувчиси Вэньчан космодромидан (Хитой жанубидаги Хайнань ороли) учирилганидан сўнг кўп ўтмай портлаб кетди. Агар муаммо двигателларда бўлиб чиқса, бу мамлакатдаги бошқа парвозлар муддатига таъсир қилиши мумкин. Бу ҳақда “Space” хабар берди.
Қайд этилишича, ҳодиса кеча, 10 август куни Пекин вақти билан соат 20:02 атрофида юз берган. Ракета ҳавода стартдан атиги 85 сония ўтгач портлаб кетган.
“Long March 7A” орбитага “Zhongxing-4B” алоқа сунъий йўлдошини олиб чиқиши керак бўлган. Портлаш ракетанинг биринчи босқичи ажралишидан олдин юз берган ва сунъий йўлдош ҳам портлаб кетган.
“Синьхуа” парвоз пайтида “фавқулодда вазият” юз бергани ва бу портлашни келтириб чиқарганини хабар қилди. Ҳозирда унинг сабабларини аниқлаш учун суриштирув ишлари олиб борилмоқда. Бироқ сунъий йўлдошнинг ҳарбий мақоми сабабли ҳодиса тафсилотлари катта эҳтимол билан сир сақланади. Ракета парвозлари бўйича таҳлилчи Георгий Тришкин бу ҳалокатни “ўта ажабтовур” деб атаган.
“Бу каби ҳалокатлар ўтган асрнинг ўрталарида космик пойганинг илк даврида учраб турар эди, аммо ҳозир бу ҳайрат уйғотади. Айниқса, бу унинг 18-учирилиши бўлган ракета учун кутилмаган ҳолдир”, дейди у.
Экспертнинг айтишича, ҳодисага ишлаб чиқаришдаги нуқсон ҳам, парвозни режалаштиришдаги хатоликлар ҳам сабаб бўлган бўлиши мумкин. Марказий босқичдаги YF-100 двигателларида ҳам муаммолар юзага келган бўлиши мумкин. Шу билан бирга, ушбу двигатель Хитой ракеталарида энг кенг қўлланиладиганлардан бири ҳисобланади ва ундаги носозлик мамлакатдаги бошқа парвозлар муддатига таъсир қилиши мумкин.
“Хитойда ҳар йили бир нечта ракета ҳалокати юз беради, бу биринчи навбатда парвозлар сонини ошириш ва янги тизимларни фойдаланишга топширишнинг юқори суръатлари билан боғлиқ. Жорий йилда бу аллақачон тўртинчи ҳалокат – бу барча мамлакатлар орасидаги антирекорддир”, дея хулоса қилади таҳлилчи.
Хитой учун бу ҳақиқатан ҳам жорий йилдаги тўртинчи муваффақиятсиз парвоз. 17 январь куни бирданига иккита учириш муваффақиятсизликка учраган эди. Апрель ойи бошида эгаси Falcon 9 кўп марталик ракетасига Хитойнинг жавоби бўлиши керак бўлган Tianlong-3 ракетасининг учирилиши ҳам ҳалокат билан якунланди.
“Long March 7A” лойиҳаси учун ушбу носозлик 2020 йил мартидаги илк парвозидан бери иккинчиси бўлди: ўшанда ҳам миссия барбод бўлган эди. Умуман олганда, бу ушбу ракетанинг 18-учирилиши эди.
